Qazaqstandyq bes oquşy AQŞ-taǧy bedeldı jekemenşık mektepterde ekı jyl tegın bılım aluǧa mümkındık aldy. Şäkırtaqy oqu aqysy men jataqhanadan bastap, tamaqtanu, medisinalyq saqtandyru jäne oqu qūraldaryna deiıngı şyǧyndardy tolyq qamtidy.
Byltyr üş qazaqstandyq oquşy arnaiy grantqa ie bolsa, biyl olardyŋ qataryna taǧy bes şäkırt qosyldy. Būl mümkındık «Oliver Grace Scholars Program» baǧdarlamasy aiasynda ūsynylyp otyr.
«Oliver Grace Scholars Program» grantynyŋ kölemı bır oquşyǧa ekı jylǧa şamamen 160 myŋ AQŞ dollaryn qūraidy. Būl qazırgı baǧammen 80 million teŋgege juyq.
Şäkırtaqy aiasynda oquşylardyŋ oqu aqysy, jataqhanada tūruy, tamaqtanuy, medisinalyq saqtandyruy jäne oqu qūraldary tölenedı. Sonymen qatar olardyŋ AQŞ-qa jylyna ekı ret baryp-qaitu şyǧyny da grantqa engızılgen.
Biyl Erasyl, Arystan jäne Älımjan esımdı üş qazaqstandyq oquşy Konnektikut ştatyndaǧy Salisbury School jekemenşık mektebınıŋ Oliver Greis atyndaǧy ekı jyldyq grantyna ie boldy.
Almatylyq Äsiia men Aibike de biyl AQŞ-ta bılım alu mümkındıgıne qol jetkızdı. Olar Vaşington maŋyndaǧy Episcopal High School mektebıne qazaq qyzdaryna arnalǧan alǧaşqy ekı grant boiynşa qabyldanǧan.
Salisbury School – Konnektikut ştatynda ornalasqan jekemenşık mektep. 1901 jyly qūrylǧan oqu ornynda 9-12 synyp oquşylary bılım alady.
Mektep şamamen 300 gektar aumaqta ornalasqan jäne 300-ge juyq oquşyǧa arnalǧan. Qazır mūnda AQŞ-tyŋ 40 ştatynan jäne älemnıŋ 49 elınen kelgen oquşylar bılım alyp jatyr. Olardyŋ arasynda Qazaqstannan barǧan alty oquşy bar. Beseuı Nazarbaev Ziiatkerlık mektepterınde bılım alǧan.
Oqu orny oquşylardy akademiialyq bılımmen qatar intellektualdyq, fizikalyq jäne tūlǧalyq tūrǧydan damytuǧa baǧyttalǧan. Sondai-aq tülekterın AQŞ-taǧy jetekşı universitetterge tüsuge daiyndaidy.
Byltyr Salisbury School-da arnaiy şäkırtaqyǧa alǧaş ret qazaqstandyq üş oquşy – Mūqaǧali, Miras jäne Aidar ie bolǧan edı. Olar biyl oqu ornyn tämamdap, attestat aluǧa daiyndalyp jatyr.
2025/2026 oqu jylyndaǧy akademiialyq nätijeler boiynşa mekteptıŋ eŋ üzdık üş oquşysynyŋ ekeuı Qazaqstannan barǧan şäkırtter bolǧan.
Qazaqstandyq oquşylarǧa arnalǧan būl mümkındık Ǧabit Bekahmetov pen amerikalyq filantrop Oliver Greistıŋ bailanysy arqyly jüzege asyp otyr.
Oqiǧa osydan şamamen 25 jyl būryn bastalǧan. Qaraǧandydaǧy qazaq-türık liseiınde oqyǧan Ǧabit Bekahmetov mektep bıtırgennen keiın AQŞ-qa attanyp, Soltüstık Karolina ştatyndaǧy Duke University universitetıne oquǧa tüsken.
Ol TMD elderınen şyqqan daryndy studentterge arnalǧan Oliver Greis şäkırtaqysynyŋ iegerı atanyp, universitettegı oquyn sättı aiaqtaǧan.
Bügınde Ǧabit Bekahmetov – bılım salasynyŋ mamany, bırneşe kıtaptyŋ avtory ärı zamanaui jekemenşık mektepterdıŋ negızın qalauşy. Onyŋ qatarynda «Bılım kemelerı: NZM, BİL, RFMM» jäne «Barsakelmes» kıtaptary bar.
Ǧabit Bekahmetovtıŋ bılım salasyndaǧy jolyn baqylaǧan Oliver Greis Qazaqstan jastaryna qoldau körsetudı jalǧastyru turaly şeşım qabyldaǧan.
Oliver Greis – Salisbury School-dy 1972 jyly tämamdaǧan tülek. 2025 jyly ol Ǧabit Bekahmetovpen bırlesıp, Qazaqstan oquşylaryna arnalǧan jaŋa şäkırtaqy baǧdarlamasyn ıske qosqan.
Baǧdarlama boiynşa jyl saiyn 200-300 ümıtkerdıŋ arasynan üş oquşy ırıkteledı. Kandidattardyŋ akademiialyq ülgerımı, jetıstıkterı jäne basqa da körsetkışterı baǧalanyp, olar arnaiy sūhbattan ötedı.
Alǧaşqy jyly baǧdarlama tek ūldarǧa arnalǧan bolsa, biyl qazaq qyzdaryna da mümkındık berıldı. Osylaişa, Vaşington maŋyndaǧy Episcopal High School mektebıne Qazaqstannan ekı qyzǧa arnalǧan grant bölındı.
Äsiia men Aibike ırıkteuden ötıp, AQŞ-taǧy jaŋa oqu jylyn bastap kettı.
Qazaqstandyq oquşylardyŋ halyqaralyq deŋgeidegı bedeldı mektepterde bılım aluy olardyŋ şeteldık joǧary oqu oryndaryna daiyndaluyna da mümkındık beredı. Baǧdarlamany ūiymdastyruşylar aldaǧy uaqytta bılımdı ärı talantty qazaqstandyq jastardy qoldaudy jalǧastyrudy közdep otyr.
Alma Sailauqyzy
