فوتو: ارحيۆ
قازاقستان پرەزيدەنتى قاسىم-جومارت توقاەۆ پەن رەسەي پرەزيدەنتى ۆلاديمير پۋتين بريكس ءسامميتى ءوتىپ جاتقان نيۋ-دەليدە بەيرەسمي كەزدەسۋ وتكىزدى. رەسەيلىك باق-تىڭ مالىمەتىنشە، مەملەكەت باسشىلارى مەن دەلەگاتسيالارعا ارنالعان سالتاناتتى قابىلداۋدان كەيىن پۋتين توقاەۆتى ۇندىستانداعى رەزيدەنتسياسىنا شاقىرعان، دەپ حابارلايدى “ادىرنا”.
كرەمل بۇل كەزدەسۋدىڭ بولعانىن راستادى. رەسەي پرەزيدەنتىنىڭ ءباسپاسوز حاتشىسى دميتري پەسكوۆتىڭ ايتۋىنشا، كەزدەسۋ وتكىزۋ يدەياسى سامميت بارىسىندا پايدا بولعان.
“پرەزيدەنت توقاەۆتى جاي عانا اڭگىمەلەسىپ، بەيرەسمي تۇردە سويلەسۋ ءۇشىن شاقىردى”، –دەدى پەسكوۆ.
بريكس ءسامميتى 12–13 قىركۇيەك كۇندەرى نيۋ-دەليدە وتۋدە. وعان ۇيىمعا مۇشە مەملەكەتتەردىڭ كوشباسشىلارى مەن وكىلدەرى، سونداي-اق سەرىكتەس ەلدەر مەن حالىقارالىق ۇيىمداردىڭ وكىلدەرى قاتىسۋدا.
قاسىم-جومارت توقاەۆ نيۋ-دەليگە ءبىر كۇن بۇرىن كەلگەن. اۋەجايدا ونى ءۇندىستان ۇكىمەتىنىڭ وكىلدەرى قارسى الىپ، قازاقستان دەلەگاتسياسىنا ۇلتتىق بيلەر مەن قۇرمەت قاراۋىلىنىڭ قاتىسۋىمەن ارنايى سالتاناتتى ءراسىم ۇيىمداستىرىلدى.
ساپار بارىسىندا قازاقستان پرەزيدەنتى «اۋتريچ»/«بريكس+» فورماتىنداعى پلەنارلىق وتىرىستا ءسوز سويلەيدى.
سونىمەن قاتار، ونىڭ بىرقاتار ەكىجاقتى كەزدەسۋلەر وتكىزۋى جوسپارلانعان. سامميتكە، اتاپ ايتقاندا، ۆلاديمير پۋتين، سي تسزينپين، ماسۋد پەزەشكيان، سيريل رامافوسا جانە ابۋ-ءدابيدىڭ تاق مۇراگەرى حالەد بين مۇحاممەد بين زايد ءال ناحايان قاتىسۋدا.
