مەملەكەت باسشىسى قاسىم-جومارت توقاەۆ ازەربايجان پرەزيدەنتى يلحام اليەۆپەن تەلەفون ارقىلى سويلەستى. بۇل تۋرالى بۇگىن، 24 جەلتوقساندا اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
قاسىم-جومارت توقاەۆ يلحام اليەۆتى تۋعان كۇنىمەن قۇتتىقتاپ، ونىڭ باۋىرلاس ازەربايجان حالقىنىڭ يگىلىگى جولىندا اتقارىپ جاتقان جاۋاپتى مەملەكەتتىك قىزمەتىنە تابىس تىلەدى.
قازاقستان باسشىسى ازەربايجاننىڭ ەگەمەندىگى مەن مەملەكەتتىلىگىن نىعايتۋدا، سونداي-اق تۇراقتى ەكونوميكالىق ءوسىمدى قامتاماسىز ەتىپ، ەلىنىڭ حالىقارالىق ارەناداعى بەدەلىن ارتتىرۋدا يلحام اليەۆتىڭ ايرىقشا ءرول اتقاراتىنىنا توقتالدى.
مەملەكەتتەر باسشىلارى قازاق-ازەربايجان قاتىناستارى قارقىندى دامىپ كەلە جاتقانىن اتاپ ءوتتى. ستراتەگيالىق سەرىكتەستىك پەن وداقتاستىق بايلانىستاردى ودان ءارى نىعايتۋ، ساۋدا-ەكونوميكالىق جانە مادەني-گۋمانيتارلىق سالالارداعى ىنتىماقتاستىقتى كۇشەيتۋ پەرسپەكتيۆاسىن تالقىلادى.
اڭگىمەلەسۋ بارىسىندا جوعارى دەڭگەيدە، سونىڭ ىشىندە يلحام اليەۆتىڭ بيىل 20-21 قازان كۇندەرى قازاقستانعا جاساعان مەملەكەتتىك ساپارى بارىسىندا قول جەتكىزىلگەن ۋاعدالاستىقتاردى ساپالى جۇزەگە اسىرۋعا ەرەكشە نازار اۋدارىلدى.
سونىمەن قاتار پرەزيدەنتتەر وڭىرلىك جانە حالىقارالىق كۇن تارتىبىندەگى وزەكتى ماسەلەلەر جونىندە پىكىر الماستى.
ال قازاقستاننىڭ ەكس-پرەزيدەنتى نۇرسۇلتان نازارباەۆ ازەربايجان پرەزيدەنتىن 19 جەلتوقساندا قۇتتىقتاپ قويعان ەدى.
ەسكە سالايىق، بۇعان دەيىن قازاقستان پرەزيدەنتى رەسەيگە تمد ەلدەرى باسشىلارىنىڭ ءداستۇرلى بەيرەسمي باسقوسۋىنا بارىپ قايتقان بولاتىن. ازەربايجان پرەزيدەنتى يلحام اليەۆ تاۋەلسىز مەملەكەتتەر دوستاستىعىنىڭ بەيرەسمي سامميتىنە قاتىسادى دەلىنگەنىمەن، سوڭعى ساتتە ودان باس تارتقان.
