اتىراۋ وبلىسىنىڭ قۇرمانعازى اۋدانىندا مەديتسينالىق پۋنكتتىڭ 59 جاستاعى كۇزەتشىسىنىڭ ولىمىنە قاتىستى تەرگەۋ جۇرگىزىلىپ جاتىر، دەپ حابارلايدى "ادىرنا" ۇلتتىق پورتالى كتك-عا سىلتەپ.
مارقۇمنىڭ دەنەسى افاناسەۆ اۋىلىنداعى مەديتسينالىق پۋنكت اۋماعىنان تابىلعان.
تەلەارنا مالىمەتىنشە، كلارا كەنجەعاليەۆا مەديتسينالىق پۋنكتتە كۇزەتشى بولىپ جۇمىس ىستەگەن. وقيعاعا دەيىن وعان عيمارات اۋماعىنداعى ءشوپتى شابۋ تاپسىرىلعانى ايتىلعان. بىرنەشە ساعاتتان كەيىن ايەلدى ۇلى كۇرەك ۇستاعان كۇيىندە ءولى تاۋىپ العان. مارقۇمنىڭ تۋىستارىنىڭ ايتۋىنشا، ايەل كۇزەت قىزمەتىمەن قاتار مەديتسينالىق پۋنكتتىڭ اينالاسىن تازالاۋعا دا جاۋاپتى بولعان. ولاردىڭ سوزىنشە، وقيعاعا دەيىن نىسانعا كوميسسيا كەلەتىندىگى ايتىلىپ، اۋماقتى رەتكە كەلتىرۋ تاپسىرىلعان. تۋىستارى جەدەل جاردەم قىزمەتكەرلەرى مارقۇمنىڭ دەنەسىنەن كۇيىككە ۇقساس ىزدەردى بايقاعانىن ايتىپ وتىر. وسىعان بايلانىستى ولار ايەلدىڭ ءولىمىنىڭ سەبەبىنە كۇمان كەلتىرگەن.
ال ءمايىتحانا دارىگەرلەرىنىڭ قورىتىندىسىندا كلارا كەنجەعاليەۆانىڭ ميىنا قان قۇيىلۋى سالدارىنان قايتىس بولعانى كورسەتىلگەن.
مارقۇمنىڭ اعاسى بۇل قورىتىندىمەن كەلىسپەيتىنىن ايتىپ، ايەلدىڭ دەنەسىندەگى جاراقاتتارعا بايلانىستى قوسىمشا تەكسەرۋ جۇرگىزۋدى تالاپ ەتكەن. وقيعانىڭ ءمان-جايىن انىقتاۋدا مەديتسينالىق پۋنكت اۋماعىنداعى بەينەباقىلاۋ كامەرالارى دا ماڭىزدى بولۋى مۇمكىن. الايدا وقيعا كەزىندە كامەرالاردىڭ جۇمىس ىستەمەگەنى بەلگىلى بولعان.
ءوز كەزەگىندە قۇرمانعازى اۋداندىق اۋرۋحاناسىنىڭ ديرەكتورى سايدا زۇلقاشەۆا كۇزەتشىگە قاۋىپتى نىسانداردىڭ، ونىڭ ىشىندە گەنەراتور مەن ترانسفورماتور ماڭىنداعى ءشوپتى شابۋ تۋرالى ناقتى تاپسىرما بەرىلمەگەنىن ايتتى. ونىڭ ايتۋىنشا، قىزمەتكەرلەرگە اۋماقتى تازا ۇستاۋ جونىندە جالپى تالاپ قويىلعان.
قازىر مارقۇمنىڭ تۋىستارى پروكۋراتۋراعا جۇگىنىپ، وقيعاعا جان-جاقتى ءارى وبەكتيۆتى باعا بەرۋدى سۇرادى.
