كەنەسارى قاسىمۇلىنىڭ قۇرانى ەلگە قايتارىلىپ، قازاقستان رەسپۋبليكاسىنىڭ مەملەكەتتىك كەڭەسشىسى قولىنان قمدب باسشىسىنا تابىستالدى، دەپ جازادى "ادىرنا".
قاسىم-جومارت توقاەۆ قۇرىلتاي وتىرىسىندا كەنەسارى حاننىڭ قۇرانى تابىلىپ، ونىڭ قازاقستان مۇسىلماندارى ءدىني باسقارماسىنا تابىستالاتىنىن اتاپ وتكەن بولاتىن.
بۇگىن پرەزيدەنتتىڭ تىكەلەي تاپسىرماسى بويىنشا مەملەكەتتىك كەڭەسشى ەرلان قارين مۇفتياتقا بارىپ، كەنەسارى حاننىڭ قۇرانىن تابىستادى.
بۇل تۋرالى ەرلان قارين ءوزىنىڭ Facebook پاراقشاسىنداعى جازباسىندا ءبولىستى.
"قۇراننىڭ تۇپنۇسقا قولجازباسى قاتتى شىعىستىق مۇقابامەن تۇپتەلگەن. ونىڭ كولەمى 16ح23 سم، كىتاپ اقشىل-سارى ءتۇستى 744 بەتتەن تۇرادى، ءاربىر بەتكە 12 جولدان تۇسكەن. كوركەم بەزەندىرىلگەن پاراقتاردىڭ باسى، ورتاسى جانە سوڭى قولمەن جازىلعان. سونداي-اق، پاراقتار التىن، كوك، جاسىل جانە قىزىل ءتۇستى وسىمدىك سۋرەتتەرىمەن ادىپتەلگەن. ال ءار جولدىڭ اراسى التىن جالاتىلعان سىناپپەن كومكەرىلگەن" دەپ جازدى ەرلان قارين ءوز جازباسىندا.
قۇران قولجازباسىنىڭ ورتاسىندا قازاق تىلىندە «قازاق حانى كەنەسارى. وعان اللانىڭ كومەگى بولسىن. اللاعا ءۇمىت ارتقان (اللاعا قايتاتىن) كەدەي قۇلدىڭ دۇعاسىمەن. مۋللا مارال يبن قۇربان بابا...» دەگەن جازۋ مەن يشاننىڭ ءمورى بارى جانە قاسىنا حان كەنەنىڭ دە ءمورى باسىلعانى ايتىلدى.
حان كەنەنىڭ قولى تيگەن قاسيەتتى قۇراندى باس ءمۇفتي ناۋرىزباي قاجى تاعانۇلىنا تابىستالدى.
"قۇراننىڭ بۇل نۇسقاسى قازاق حالقىنىڭ تاريحي جادىگەرى ەكەنى ءسوزسىز. سونداي-اق ونىڭ تاريحي جانە مۋزەيلىك قۇندىلىعى وتە جوعارى. بۇگىن پرەزيدەنتتىڭ تاپسىرماسى بويىنشا كەنەسارى حاننىڭ قۇرانى قازاقستان مۇسىلماندارى ءدىني باسقارماسىنا تابىستالدى. سولايشا، كيەلى كىتاپ قۇتتى ورىنا قايتا ورالدى" دەپ قوستى قر مەملەكەتتىك كەڭەسشىسى ەرلان قارين.
"ادىرنا" ۇلتتىق پورتالى
