مەملەكەتتىك كەڭەسشى، قازاقستان رەسپۋبليكاسىنىڭ يۋنەسكو جانە يسەسكو ىستەرى جونىندەگى ۇلتتىق كوميسسياسىنىڭ توراعاسى ەرلان قارين يۋنەسكو-نىڭ پاريجدە ءوتىپ جاتقان 42-ءشى باس كونفەرەنتسياسىنىڭ جالپىساياسي دەباتتارىندا ءسوز سويلەدى، دەپ حابارلايدى “ادىرنا” پورتالى.
ەرلان قارين قازاقستاننىڭ يۋنەسكو-مەن جان-جاقتى ارىپتەستىكتى دامىتۋعا باسا ءمان بەرەتىنىن اتاپ ءوتتى.
مەملەكەتتىك كەڭەسشى مۇنداي ىقپالداستىق ەلىمىزدە ساياسي، ەكونوميكالىق جانە الەۋمەتتىك-گۋمانيتارلىق رەفورمالار جۇرگىزۋگە ىقپال ەتەتىنىن ايتتى. دەلەگاتتارعا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ تۇركىستاندا وتكەن ۇلتتىق قۇرىلتايدىڭ ەكىنشى وتىرىسىندا جانە بيىلعى 1 قىركۇيەكتەگى قازاقستان حالقىنا جولداۋىندا ايتىلعان بىرقاتار باستاما تۋرالى اقپارات بەرىلدى.
“قازاقستاندا جۇرگىزىلىپ جاتقان رەفورمالاردىڭ ماقساتى – ءبىلىم، عىلىم جانە مادەنيەتتى وركەندەتۋ ارقىلى ۇلتتىڭ جاڭا ساپاسىن قالىپتاستىرۋ”، – دەدى ەرلان قارين.
مەملەكەتتىك كەڭەسشى ەلىمىزدە مادەني جانە تابيعي مۇرالاردى قورعاۋعا قاتىستى ناقتى جوبالاردى ىسكە اسىرۋ، ءبىلىم بەرۋ سالاسىن، جاراتىلىستانۋ جانە گۋمانيتارلىق عىلىمداردى، كوممۋنيكاتسيا جانە بۇقارالىق اقپارات قۇرالدارىن دامىتۋ ءۇشىن يۋنەسكو-نىڭ دايەكتى تۇردە قولداۋ كورسەتۋى ماڭىزدى ەكەنىنە توقتالدى.
ەرلان قارين بەيبىتشىلىكتى نىعايتۋعا، ورنىقتى دامۋعا جانە مادەنيەتارالىق ديالوگتى وركەندەتۋگە ىقپال ەتەتىن ۇيىمنىڭ مىنبەرىنەن ءسوز سويلەپ، قازاقستان پرەزيدەنتىنىڭ بىرىككەن ۇلتتار ۇيىمى باس اسسامبلەياسىنىڭ سەسسياسىندا كيەلى كىتاپتاردى، سونىڭ ىشىندە قۇراندى ۆانداليزمنەن قۇقىقتىق تۇرعىدان قورعاۋ قاجەت ەكەنى جونىندە مالىمدەمە جاساعانىن ەسكە سالدى.
سونداي-اق «تۇراننىڭ قىسقى سۋىق شولدەرى» كوپۇلتتىق نوميناتسياسىنىڭ قۇرامداس بولىكتەرى رەتىندە «التىن ەمەل» ۇلتتىق پاركى مەن بارساكەلمەس قورىعى اۋماقتارىن دۇنيەجۇزىلىك مۇرا تىزىمىنە قوسۋعا قولداۋ بىلدىرگەنى ءۇشىن ۇيىمعا مۇشە مەملەكەتتەرگە العىس ايتتى.
كليماتتىڭ وزگەرۋ سەبەپتەرىنە بايلانىستى مەملەكەت باسشىسى قاسىم-جومارت توقاەۆتىڭ بىرىككەن ۇلتتار ۇيىمى اياسىندا 2026 جىلى قازاقستاندا ايماقتىق كليماتتىق سامميت وتكىزۋ تۋرالى باستاماسىنا نازار اۋدارىلدى.
ەرلان قارين ءسوزىن قورىتىندىلاي كەلە، قازاقستاننىڭ يۋنەسكو-مەن اراداعى ءتيىمدى ەكىجاقتى ىنتىماقتاستىقتى ودان ءارى دامىتۋعا جانە نىعايتۋعا دايىن ەكەنىن جەتكىزدى.
