ەنەرگەتيكا مينيسترلىگى كاسپي قۇبىر كونسورتسيۋمىنىڭ (كقك) نىساندارىنا جاسالعان درون شابۋىلىنا قاتىستى تۇسىنىكتەمە بەردى، دەپ حابارلايدى «ادىرنا» ءتىلشىسى.
وقيعا 8 قىركۇيەكتە كقك تەرمينالىنىڭ ماڭىندا بولعان.
« №1 جانە №3 قاشىقتان تيەۋ قۇرىلعىلارىنا تيەۋ وپەراتسيالارى ۋاقىتشا توقتاتىلدى. كقك-نىڭ جۇك تيەۋ جۇيەلەرى مەن تانكەرلەردىڭ جاعدايىنا قاجەتتى تەكسەرۋلەر جۇرگىزىلگەننەن كەيىن تيەۋ جۇمىستارىن جالعاستىرۋعا كەدەرگى كەلتىرەتىن ەشقانداي اقاۋ انىقتالعان جوق. قورشاعان ورتاعا دا زيان كەلمەگەن»،– دەلىنگەن حابارلامادا.
تەكسەرىستەن كەيىن جۇك تيەۋ وپەراتسيالارى قايتا جاندانعان. مينيسترلىك قازاقستاندىق جۇك جونەلتۋشىلەردەن مۇناي قابىلداۋعا ەشقانداي شەكتەۋ ەنگىزىلمەگەنىن ەرەكشە اتاپ ءوتتى.
بۇعان دەيىن ەنەرگەتيكا مينيسترلىگى كاسپي قۇبىر كونسورتسيۋمىنا جاسالعان شابۋىلداردىڭ سالدارىنان قازاقستاننىڭ 2026 جىلعا جوسپارلانعان مۇناي ءوندىرۋ كولەمى 98 ميلليون توننادان 96 ميلليون تونناعا دەيىن تۇزەتىلگەنىن حابارلاعان بولاتىن.
