ترانسكاسپي حالىقارالىق كولىك باعىتى بويىنشا تاسىمالداۋ كولەمى 8 ايدا 22 پايىزعا ءوستى. بۇل تۋرالى كولىك ۆيتسە-ءمينيسترى جانىبەك تايجانوۆ ايتتى، دەپ حابارلايدى «ادىرنا» ءتىلشىسى.
مينيستر 7–8 قىركۇيەك كۇندەرى باتۋمي قالاسىندا وتكەن گرۋزيا حالىقارالىق تەڭىز فورۋمىنا قاتىسقان. فورۋم بارىسىندا حالىقارالىق كولىك دالىزدەرىن دامىتۋ، ەۋروپا مەن ازيا اراسىنداعى كولىك-لوگيستيكالىق بايلانىستاردى نىعايتۋ، سونداي-اق كولىك سالاسىن تسيفرلاندىرۋ ماسەلەلەرى تالقىلانعان.
فورۋمنىڭ العاشقى كۇنىندە جانىبەك تايجانوۆ «تەڭىزدەردەن دالىزدەرگە: الەمدىك ساۋدانىڭ جاڭا گەوگرافياسى» اتتى پانەلدىك سەسسيادا ءسوز سويلەگەن. تالقىلاۋ بارىسىندا ورتا ءدالىزدى دامىتۋعا، تەڭىز، تەمىرجول جانە پورت كولىگىن ءوزارا ىقپالداستىرۋعا، سونداي-اق حالىقارالىق جەتكىزۋ تىزبەكتەرىنىڭ موبيلدىلىگى مەن تيىمدىلىگىن ارتتىرۋعا ەرەكشە نازار اۋدارىلعان.
ۆيتسە-مينيستر ترانسكاسپي حالىقارالىق كولىك مارشرۋتىنىڭ (تحكم) دامۋىنداعى وڭ ديناميكانى اتاپ وتكەن. بيىلعى 8 ايدىڭ قورىتىندىسى بويىنشا تحكم ارقىلى تاسىمال كولەمى 22%-عا ارتقان. ال شىعىس–باتىس باعىتى بويىنشا ترانزيتتىك تاسىمال 55%-عا وسكەن.
ءىس-شارا اياسىندا پورت ينفراقۇرىلىمىن دامىتۋ، تەڭىز كولىگى سالاسىنداعى حالىقارالىق ىنتىماقتاستىق، سالانى تسيفرلىق ترانسفورماتسيالاۋ، ناۆيگاتسيا مەن كەمە قاتىناسى قاۋىپسىزدىگىن جەتىلدىرۋ، سونداي-اق تەڭىز سەكتورىندا ء«بىر تەرەزە» قاعيداتىن قولدانۋ ماسەلەلەرى دە تالقىلانعان.
سونىمەن قاتار جانىبەك تايجانوۆ فورۋم اياسىندا بەيىندى مينيسترلىكتەر مەن ۆەدومستۆولاردىڭ، سونداي-اق بيزنەس وكىلدەرىمەن ەكىجاقتى كەزدەسۋلەر وتكىزگەن. كەزدەسۋلەر بارىسىندا كولىك-لوگيستيكا سالاسىنداعى ىنتىماقتاستىقتى ودان ءارى دامىتۋ، ورتا ءدالىز ارقىلى جۇك اعىنىن ارتتىرۋ جانە كولىك پروتسەستەرىن تسيفرلاندىرۋ ماسەلەلەرى تالقىلانعان.
