ازەربايجان مەن قازاقستان اراسىنداعى ترانسكاسپي تالشىقتى-وپتيكالىق بايلانىس جەلىسى ءبىر ايعا جەتپەيتىن ۋاقىتتا ىسكە قوسىلادى دەپ كۇتىلۋدە. بۇل تۋرالى ازەربايجاننىڭ ەكونوميكا ءمينيسترى ميكايل جابباروۆ باكۋدە وتكەن CAMCA 2026 وڭىرلىك فورۋمىندا مالىمدەدى، دەپ حابارلايدى «ادىرنا» ءتىلشىسى.
«دەرەكتەردى بەرۋ سالاسىندا ءبىر ايعا جەتپەيتىن ۋاقىتتا ىسكە قوسىلادى دەپ كۇتىلىپ وتىرعان ازەربايجان مەن قازاقستان اراسىنداعى ترانسكاسپي تالشىقتى-وپتيكالىق بايلانىس جەلىسى ەۋروپا مەن ازيانى جالعايتىن جاڭا جوعارى ءونىمدى بايلانىس ارناسىن قالىپتاستىرادى»، – دەدى جابباروۆ.
ءمينيستردىڭ ايتۋىنشا، قازىرگى زامانعى وڭىرلىك دالىزدەر تەك جۇك تاسىمالىمەن شەكتەلمەي، ەنەرگەتيكالىق جانە تسيفرلىق بايلانىستاردى دا قامتيدى.
بۇعان دەيىن تەڭىز تۇبىنەن كەلەتىن ترانسكاسپي جەلىسى جىل سوڭىنا دەيىن ىسكە قوسىلاتىنى ايتىلعان ەدى.
