ترانسكاسپي حالىقارالىق كولىك باعىتى الەۋەتىنىڭ تانىستىرىلىمى ءوتتى، دەپ حابارلايدى “ادىرنا”.
وتكەن اپتادا گرەكيادا وتكەن بالقان جانە قارا تەڭىز فورۋمىنىڭ باسشىلارىمەن ۇيىمداستىرىلعان دوڭگەلەك ۇستەل بارىسىندا قازاقستاننىڭ گرەكياداعى ەلشىسى ەرلان باۋداربەك-قوجاتاەۆ رەسەيدى اينالىپ وتەتىن كولىك ءدالىزىن تانىستىردى.
حالىقارالىق ءىس-شاراعا گرەكيا سىرتقى ىستەر ءمينيسترىنىڭ ورىنباسارى كوستاس فراگوياننيس، شەتەلدىك ەلشىلەر مەن بالقان جانە قارا تەڭىز وڭىرلەرى ەلدەرىنىڭ بىرقاتار ىسكەر توپتارىنىڭ وكىلدەرى قاتىستى.
اتالمىش فورۋمنىڭ اتقارۋشى كوميتەتىنىڭ توراعاسى گيانيس بالاكاكيس ەۋروپالىق قايتا قۇرۋ جانە دامۋ بانكىنىڭ ەۋروپا مەن ورتالىق ازيا اراسىنداعى تۇراقتى كولىك بايلانىستارىن ورناتۋ بويىنشا زەرتتەۋىنىڭ ناتيجەسى قازاقستان مەن گرەكيا اراسىنداعى كولىك جانە لوگيستيكا سالاسىنداعى ىنتىماقتاستىقتى دامىتۋدىڭ جاقسى پەرسپەكتيۆالارىن كورسەتەتىنىن اتاپ ءوتتى.
سونىمەن قاتار ترانسكاسپي حالىقارالىق كولىك باعىتى فورۋمىندا گرەك كومپانيالارىنىڭ قىزىعۋشىلىعى بار ەكەنىن جەتكىزدى.
«تحكب» حالىقارالىق قاۋىمداستىعى – بۇگىندە بىرقاتار ەلدەر مەن كومپانيالاردىڭ مۇددەلەرىن بىرىكتىرەتىن جانە بىلدىرەتىن، سول ارقىلى تاريحي ۇلى جىبەك جولىنىڭ باعىتىن جانداندىراتىن ۇيىم بولىپ تابىلادى.
