قازاقستاندا مەكتەپ فورماسىنا قويىلاتىن بىرىڭعاي تالاپتاردى بۇزعان جەكەمەنشىك ءبىلىم بەرۋ ۇيىمدارى ليتسەنزياسىنان ايىرىلۋى مۇمكىن، دەپ حابارلايدى "ادىرنا" ءتىلشىسى.
بۇل تۋرالى وقۋ-اعارتۋ ءمينيسترى جۇلدىز سۇلەيمەنوۆا ۇكىمەتتەگى بريفينگتە ايتتى.
مينيسترگە كەيبىر جەكەمەنشىك مەكتەپتەردە وقۋشىلارعا حيدجاب كيۋگە رۇقسات بەرىلگەنى جانە ونىڭ مينيسترلىكتىڭ جالپى ساياساتىنا قانشالىقتى سايكەس كەلەتىنى تۋرالى سۇراق قويىلدى.
جۇلدىز سۇلەيمەنوۆا قازاقستان مەكتەپتەرىندە بىرىڭعاي مەكتەپ فورماسى بەلگىلەنگەنىن اتاپ ءوتتى. ونىڭ ايتۋىنشا، وتكەن جىلى مۇنداي جاعدايلار، سونىڭ ىشىندە جەكەمەنشىك مەكتەپتەردە كەزدەسكەن.
«بىزدە بىرىڭعاي فورما. بارلىق مەكتەپ وسى تالاپتارعا سايكەس جۇمىس ىستەيدى. مۇنداي جاعدايلار بولدى. ءبىز بۇل مەكتەپتەرمەن جۇمىس ىستەپ جاتىرمىز. بۇل ماسەلەمەن ۇلتتىق قاۋىپسىزدىك كوميتەتى دە بىرلەسىپ اينالىسادى»، – دەدى مينيستر.
ونىڭ ايتۋىنشا، ماسەلەنى ارنايى كوميسسيا قاراستىرادى. ونىڭ قۇرامىنا اكىمدىكتەر مەن جەرگىلىكتى اتقارۋشى ورگانداردىڭ وكىلدەرى دە كىرەدى.
«قازىر، وقۋ جىلىنىڭ باسىندا، مۇنداي مەكتەپتەر جوق»، – دەدى جۇلدىز سۇلەيمەنوۆا.
مينيستر مەكتەپ فورماسىنا قاتىستى تالاپتاردى بۇزۋ فاكتىسى انىقتالعان جاعدايدا ءبىلىم بەرۋ ۇيىمى ليتسەنزياسىنان ايىرىلۋى مۇمكىن ەكەنىن ەسكەرتتى.
