ون ەكى جىلدىق ءبىلىم بەرۋ باعدارلاماسىن ءبىر جىلعا قىسقارتۋ تالقىلاندى

قازاقستاندا 12 جىلدىق ءبىلىم بەرۋ باعدارلاماسىن 11 جىلدىق وقۋ مەرزىمىنە بەيىمدەۋ مۇمكىندىگى زەرتتەلىپ جاتىر، دەپ حابارلايدى "ادىرنا" ءتىلشىسى.

وسى ماقساتتا وقۋ-اعارتۋ مينيسترلىگىندە ارنايى كوميسسيا قۇرىلدى.

مينيستر سۇلەيمەنوۆانىڭ ايتۋىنشا، قازىر ۆەدومستۆو ءبىلىم بەرۋ باعدارلامالارىنىڭ مازمۇنى مەن ءوزارا سايكەستىگىن تالداپ جاتىر. اتاپ ايتقاندا، 12 جىلعا ەسەپتەلگەن وقۋ باعدارلاماسىن 11 جىل ىشىندە تولىق مەڭگەرتۋ مۇمكىندىگى قاراستىرىلۋدا.

«قازىر ءبىز بۇكىل باعدارلامانى 11 جىل ىشىندە اياقتاۋعا بولاتىن-بولمايتىنىن قاراستىرامىز. نازارباەۆ زياتكەرلىك مەكتەپتەرى – تولىق كۇن وقيتىن مەكتەپتەر. بالالار تاڭعى 8-دە كەلىپ، كەشكى 5-تە كەتەدى. ولاردا اپتاسىنا سەگىز جەكە ساعات بار»، – دەدى مينيستر.

ونىڭ سوزىنشە، تەوريالىق تۇرعىدان 12 جىلدىق ءبىلىم بەرۋ باعدارلاماسىنىڭ مازمۇنىن ىقشامداپ، ونى 11 سىنىپ اياسىندا جۇزەگە اسىرۋعا بولادى. وسى ماسەلەنى زەردەلەۋ ءۇشىن ارنايى كوميسسيا جۇمىس ىستەپ جاتىر.

سونىمەن قاتار جۇلدىز سۇلەيمەنوۆا كەيبىر اتا-انالار وقۋ مەرزىمىنىڭ ۇزاقتىعىنا بايلانىستى بالالارىن 10-سىنىپتان كەيىن نازارباەۆ زياتكەرلىك مەكتەپتەرىنەن الىپ كەتەتىنىن ايتتى.

«بالالارىن 10-سىنىپتان كەيىن نزم-نەن الىپ كەتەتىن اتا-انالار بار. سەبەبى ولار بالالارىنىڭ تاعى ەكى جىل، ونىڭ ىشىندە 11-سىنىپتان كەيىن قوسىمشا ءبىر جىل وقىعانىن قالامايدى»، – دەدى ول.

مينيستر بۇل جاعدايدا وقۋشىلاردى جالپى ءبىلىم بەرەتىن مەكتەپتەرگە اۋىستىرۋ كەزىندە قيىندىقتار تۋىندايتىنىن اتاپ ءوتتى. سەبەبى جالپى ءبىلىم بەرەتىن مەكتەپتەردە نەگىزگى ورتا ءبىلىم 9-سىنىپتان كەيىن اياقتالسا، نازارباەۆ زياتكەرلىك مەكتەپتەرىندە بۇل كەزەڭ 10-سىنىپتان كەيىن اياقتالادى.

جۇلدىز سۇلەيمەنوۆانىڭ ايتۋىنشا، ازىرگە 12 جىلدىق ءبىلىم بەرۋ باعدارلاماسىن 11 جىلعا ىقشامداۋ تۋرالى تۇپكىلىكتى شەشىم قابىلدانعان جوق. كوميسسيا وقۋ باعدارلامالارىن زەردەلەپ، قولدانىستاعى جۇيەنىڭ تيىمدىلىگىن باعالايدى.