قازىرگى تاڭدا قازاقستاننان ايەل عارىشكەردى ۇشۋعا دايىنداۋعا ارنالعان جەكە باعدارلاما جوق. بۇل تۋرالى Space Days Kazakhstan فورۋمى اياسىندا وتكەن بريفينگتە عارىشكەر، حالىق قاھارمانى ايدىن ايىمبەتوۆ ايتتى، دەپ حابارلايدى «ادىرنا» ءتىلشىسى.
ونىڭ سوزىنشە، بۇگىندە ەلىمىزدىڭ جەتەكشى ۋنيۆەرسيتەتتەرى مەن عىلىمي ينستيتۋتتارىنىڭ عالىمدارى پيلوتتالعان عارىش سالاسىنا ارنالعان جاڭا عىلىمي باعدارلاما ازىرلەپ جاتىر. ازىرگە تەك ايەلدەردەن قۇرالعان ەكيپاج جاساقتاۋ نەمەسە ناقتى ءبىر ايەل-عارىشكەردى عارىشقا جىبەرۋ تۋرالى ايتۋعا ەرتە. دەگەنمەن، ايىمبەتوۆ قازاقستاندىق قىزداردىڭ الەۋەتى زور ەكەنىن جەتكىزدى.
«مەن كوپتەگەن سۇحباتىمدا ءبىزدىڭ قىزدارىمىز جىگىتتەرگە دەس بەرمەيتىنىن ايتتىم. ءبىلىم بەرۋدىڭ قازىرگى دەڭگەيى كوپ نارسەنى اڭعارتادى»، — دەدى ول.
ەسكە سالايىق، 2025 جىلدىڭ قازان ايىندا استاناداعى ۇلتتىق عارىش ورتالىعىندا ۇزاق ۋاقىت وقشاۋلانۋعا ارنالعان SANA-1 ەكسپەريمەنتى وتكەن بولاتىن. وعان اەروعارىش كوميتەتىنە قاراستى ۇيىمداردىڭ ءتورت قىزمەتكەرىنەن قۇرالعان تولىقتاي ايەلدەر ەكيپاجى قاتىسقان ەدى. ولار عارىشتىق ۇشۋ جاعدايىنداعى جۇمىستى يميتاتسيالاعان.
