Öŋırde aitys önerın damytu jäne jas oryndauşylardy qoldau baǧytyndaǧy jūmystar jalǧasuda. Biyl oblysta respublikalyq jäne oblystyq deŋgeidegı jetı aitys ötkızu josparlanǧan. Aqmolalyq aqyndar būǧan deiın de ırı halyqaralyq dodalarda öz önerlerın körsetıp, öŋır namysyn abyroimen qorǧap keledı. Ūlttyq önerdı damytu jäne ūrpaqtar sabaqtastyǧy turaly brifingke qatysuşylar aityp berdı.
Aqmola oblysynyŋ mädeniet basqarmasynyŋ basşysy Nūrǧisa Daueşovtıŋ aituynşa, biyl öŋırden respublikalyq josparǧa jetı aitys engızılgen. Onyŋ üşeuı – respublikalyq, törteuı – oblystyq deŋgeidegı dodalar. Jyl basynan berı üş ırı aitys ūiymdastyryldy.
Olardyŋ qatarynda Abylai hannyŋ 315 jyldyǧyna arnalǧan «Saŋlaqtar tuǧan Sary bel» oblystyq aitysy, Jambyl Jabaevtyŋ 180 jyldyǧyna orai ūiymdastyrylǧan «Bala aqyn – jas daryn» öŋırlık mektep oquşylarynyŋ aitysy jäne respublikalyq komandalyq «Bes asyl» megajobasy bar.
Nūrǧisa Daueşov «Bes asyl» jobasyna da jeke toqtaldy. Būl joba oblysta alǧaş ret 1 mamyrda ötkızıldı. Baiqauǧa Aqmola jäne Atyrau oblystarynyŋ komandalary qatysyp, ūlttyq önerdıŋ bırneşe baǧyty boiynşa öz şeberlıkterın ortaǧa saldy. Aqmolalyq komanda joǧary nätije körsetıp, ekınşı kezeŋge joldama aldy.
«Bız üşın ūlttyq önerdıŋ tek tarihtyŋ bır bölıgı bolyp qalmaǧany maŋyzdy. Jas oryndauşylardyŋ şeberlıgın şyŋdap, ırı dodalarǧa qatysyp, respublikalyq jäne halyqaralyq deŋgeide Aqmola oblysynyŋ atynan öner körsetuıne jaǧdai jasauymyz qajet. Sondyqtan aitys önerı men jas aqyndardy qoldau jūmysymyzdyŋ maŋyzdy baǧyttarynyŋ bırı bolyp qala beredı», – dedı Nūrǧisa Daueşov.
Mūndai qoldaudyŋ naqty mysaldarynyŋ bırı – Ereimentau öŋırınen şyqqan jas aqyn Sättıbek Serıkbolatūlynyŋ jetıstıgı. Juyrda ol Moŋǧoliianyŋ Qobda aimaǧynda ötken halyqaralyq aqyndar aitysynda Gran-pri ielendı. Halyqaralyq dodaǧa Qazaqstan, Qytai jäne Moŋǧoliiadan kelgen aqyndar qatysty.
Sättıbek Serıkbolatūlynyŋ aituynşa, halyqaralyq baiqaudaǧy jeŋıs ol üşın maŋyzdy beles bolǧanymen, ol mūnymen toqtap qalmaq emes.
«Men üşın aitys – eŋ aldymen, menı üiretıp, qoldau körsetıp jürgen jandar aldyndaǧy ülken jauapkerşılık. Sahnaǧa şyqqanda özıŋdı ǧana emes, öz öŋırıŋdı, ūstazdaryŋdy da tanystyrasyŋ. Moŋǧoliiadaǧy jeŋıs maǧan odan ärı özımdı jetıldırıp, osyndai ülken sahnalarda laiyqty öner körsetuge degen senım men yntany arttyrdy», – dedı Sättıbek Serıkbolatūly.
Jas aqyndardyŋ jetıstıgınıŋ artynda ūstazdyq dästür men tälımgerlık mektebı de bar. Bügınde Sättıbek Serıkbolatūly aitys önerınıŋ qyr-syryn Erlan Däulettıŋ jetekşılıgımen meŋgerıp jür. Al Erlan Däulet – aqyn-jazuşy, Qazaqstan Jazuşylar odaǧynyŋ müşesı, Aqmola oblystyq tarihi-ölketanu muzeiınıŋ direktory Myrzabek Qūdaiberlınıŋ şäkırtı.
Myrzabek Qūdaiberlı öz kezegınde Qazaqstannyŋ halyq aqyny, Aqyndar men jyrşylar qoǧamynyŋ tūŋǧyş prezidentı Köken Şäkeiūlynyŋ şäkırtı. Bügınde ol öz bılgenın jas oryndauşylarǧa üiretıp keledı. Onyŋ şäkırtterı qatarynda Arman Berdalin, Älıbek Serǧaliev, Quanyş Ospanov, Erlan Däulet jäne basqa da aqyndar bar.
«Aitysta sabaqtastyqtyŋ maŋyzy zor. Adamǧa tek ūiqas qūrudy nemese şeşen söileudı üiretu jetkılıksız. Oǧan sözge, tarihqa, halyqqa degen közqarasty jetkızu kerek. Ūstazdarym maǧan osy täjıribenı berdı, endıgı mındetım – ony şäkırtterıme jetkızu. Bügınde Sättıbek halyqaralyq sahnaǧa şyǧyp, jeŋıske jetıp jatsa, būl sabaqtastyqtyŋ jalǧasyp kele jatqanyn körsetedı», – dedı Myrzabek Qūdaiberlı.
Bügınde aitys önerıne jaŋa buyn ökılderı kelıp jatyr. Jas aqyndar üşın būl – öz talantyn tanytyp qana qoimai, ǧasyrlar boiy halyqtyŋ ömırın, qūndylyqtaryn, quanyşy men mäselelerın söz etuge mümkındık bergen dästürdı jalǧastyrudyŋ joly.
Aitys IýNESKO-nyŋ materialdyq emes mädeni mūralar tızımıne engızılgen. Aqmola oblysynda onyŋ damuy ırı dodalar ötkızuden bastap, mektep oquşylary men jas aqyndardy qoldauǧa deiıngı bırneşe baǧyt boiynşa jüzege asyryluda. Al Sättıbek Serıkbolatūlynyŋ Moŋǧoliiadaǧy jeŋısı jas buynmen jürgızılıp jatqan jūmystyŋ nätijesı öŋır şekarasynan tys jerlerde de körınıs tauyp otyrǧanyn körsetedı.
