ياكۋتيانىڭ ياكۋتسك قالاسىندا يل تۋمەن دەپۋتاتى ۆلاديمير فيودوروۆتىڭ جۇبايىنىڭ ەسىمىمەن اتتاس كوشەنىڭ پايدا بولۋى قوعام تالقىسىنا ءتۇستى، دەپ حابارلايدى "ادىرنا" ءتىلشىسى.
جەرگىلىكتى باق دەرەگىنشە، «پوبەدا» اۋدانىندا «ۆيكتوريا» دەپ اتالاتىن كوشە بار. قوعام بەلسەندىلەرى ونىڭ اتاۋىنا قاتىستى بىرقاتار سايكەستىككە نازار اۋدارعان. اتاپ ايتقاندا، «ۆيكتوريا» — دەپۋتات ۆلاديمير فيودوروۆتىڭ جۇبايىنىڭ ەسىمى. سونىمەن قاتار كوشە دەپۋتات قالالىق ءماسليحات دەپۋتاتى بولعان كەزەڭدە پايدا بولعانى جانە وسى كووپەراتيۆ اۋماعىندا ونىڭ وتباسىنا تيەسىلى نىسان بولعانى ايتىلىپ وتىر.
بەلسەندىلەر بۇل جاعدايدان اكىمشىلىك رەسۋرستى پايدالانۋ بەلگىلەرىن كورىپ، ماسەلەنى پارلامەنتتىڭ ەتيكا جونىندەگى كوميسسياسىنا جەتكىزۋدى جوسپارلاپ وتىرعانىن مالىمدەگەن. ولاردىڭ پىكىرىنشە، دەپۋتات اۋدان توپونيميكاسىنا جەكە مۇددەسىن ارالاستىرعان بولۋى مۇمكىن.
الايدا ۆلاديمير فيودوروۆ بۇل ايىپتاۋلارمەن كەلىسپەيدى. ونىڭ ايتۋىنشا، كوشەلەرگە اتاۋ بەرۋ ونىڭ قۇزىرەتىنە كىرمەيدى. دەپۋتات «ۆيكتوريا» اتاۋى ماڭايداعى «پوبەدا» ساياباعى مەن كوشەسىنە بايلانىستى قالىپتاسقانىن ايتقان.
فيودوروۆ سونداي-اق بۇل اۋماقتا وتباسىنىڭ كوتتەدجى بولماعانىن ايتتى. ونىڭ سوزىنشە، مۇندا ۇلىنا تيەسىلى ساياجاي بولعان، بىراق ول شامامەن 15 جىل بۇرىن ساتىلىپ كەتكەن.
سونىمەن بىرگە دەپۋتات جاقىندارىنا دەگەن قارىم-قاتىناسى تۇرعىندارعا بايقالاتىنىن ماقتان تۇتاتىنىن ايتتى. ءتىپتى مۇمكىندىك بولعان جاعدايدا سۇيىكتى ادامىنىڭ قۇرمەتىنە قالالاردىڭ اتىن دا قويار ەدىم دەگەن پىكىر ءبىلدىردى.
ۆلاديمير فيودوروۆ — ياكۋتياداعى يل تۋمەن (مەملەكەتتىك جينالىس) دەپۋتاتى. ول III, IV, V جانە VII شاقىرىلىمدارعا سايلانعان.
قازىر فيودوروۆ ەكونوميكالىق، ينۆەستيتسيالىق جانە ونەركاسىپتىك ساياسات كوميتەتىنىڭ، سونداي-اق كاسىپكەرلىك جانە تۋريزم كوميتەتىنىڭ مۇشەسى.
دەپۋتاتتىق ماندات العانعا دەيىن فيودوروۆ كاسىپكەرلىكپەن اينالىسقان. قازىر ونىڭ بۇرىنعى بيزنەسىن جۇبايى ۆيكتوريا ميحايلوۆنا جۇرگىزىپ كەلەدى.
