قىرعىزستان جوعارعى كەڭەسىنىڭ (جوگوركۋ كەنەش) دەپۋتاتتارى جەتىنشى شاقىرىلىمدى تاراتۋ جونىندەگى قاۋلى جوباسىن ماقۇلدادى، دەپ حابارلايدى "ادىرنا" ۇلتتىق پورتالى فەرعاناعا سىلتەپ.
پارلامەنتتىڭ ءباسپاسوز قىزمەتى حابارلاعانداي، داۋىس بەرۋ 25 قىركۇيەكتە ءوتتى.
وتىرىستا 89 دەپۋتاتتىڭ 84-ءى ۇسىنىستى قولداپ، قارسى داۋىس بەرگەن ەشكىم بولعان جوق. بۇل باستامانى 32 دەپۋتات ۇسىنعان.
ينيتسياتيۆالىق توپ مۇشەسى ۇلان پريموۆتىڭ ايتۋىنشا، پرەزيدەنتتىك پەن پارلامەنتتىك سايلاۋلاردىڭ اراسى تىم قىسقا بولعاندىقتان، ساياسي جۇيەنىڭ تۇراقتىلىعىن قامتاماسىز ەتۋ ءۇشىن دەپۋتاتتار ءوز وكىلەتتىگىن مەرزىمىنەن بۇرىن توقتاتۋدى ءجون كورگەن. سونداي-اق ول سايلاۋ زاڭناماسىنداعى وزگەرىستەر دە شەشىمگە ىقپال ەتكەنىن ايتتى.
پارلامەنت سپيكەرى نۇرلانبەك تۇرعۇنبەك دەپۋتاتتاردىڭ ىقپالى جاڭا شاقىرىلىم جاساقتالعانعا دەيىن ساقتالاتىنىن ەسكە سالدى.
قىرعىزستان زاڭناماسىنا سايكەس، ەل پرەزيدەنتى سادىر جاپاروۆ پارلامەنت ءوزىن-ءوزى تاراتقاننان كەيىن بەس كۇن ىشىندە كەزەكتەن تىس سايلاۋ كۇنىن جاريالاۋى ءتيىس. ادەتتە سايلاۋ كۇنى 90 كۇن بۇرىن بەلگىلى بولادى، الايدا كەزەكتەن تىس جاعدايدا بۇل مەرزىم ۇشتەن بىرگە قىسقارادى. ماسەلەن، ەگەر ءتيىستى جارلىققا 26 قىركۇيەكتە قول قويىلسا، سايلاۋ 26 قاراشاعا بەلگىلەنۋى مۇمكىن.
ايتا كەتەيىك، بيىل ماۋسىمدا سادىر جاپاروۆ جاڭا سايلاۋ جۇيەسىن بەكىتكەن ەدى.
