دونەتسكىدەگى اسكەري بولىمنەن ءوز ەركىمەن كەتكەن رەسەي ازاماتى قازاقستان شەكاراسىن زاڭسىز كەسىپ وتكەن، دەپ حابارلايدى "ادىرنا".
ول اتىراۋدا ءبىر جىلدان استام ۋاقىت تۇرعان. 36 جاستاعى الەكساندر چابىەۆتى پوليتسيا 2026 جىلعى ماۋسىمدا انىقتاعان.
سوت ماتەريالدارىنا سايكەس، چابىەۆ 2025 جىلدىڭ مامىرىندا دونەتسكىدەگى اسكەري بولىمنەن كەتكەن. ول ۆولگوگرادقا دەيىن اۆتوستوپپەن جەتىپ، كەيىن قازاقستانعا قاراي بەت العان. باتىس قازاقستان وبلىسىنىڭ جانىبەك اۋدانى اۋماعىندا شەكارانى وتكىزۋ بەكەتىنەن تىس جەردە جاياۋ كەسىپ وتكەن.
رەسەي ازاماتىنىڭ قازاقستانعا رەسمي تۇردە كىرگەنى تۋرالى دەرەك بولماعان. ول كەيىن اتىراۋعا بارىپ، سوندا تۇرعان. چابىەۆ 2026 جىلعى 17 ماۋسىمدا اتىراۋ وبلىسىندا ەكسترەميزمگە قارسى ءىس-قيمىل باسقارماسىنىڭ قىزمەتكەرلەرى جۇرگىزگەن تەكسەرۋ بارىسىندا انىقتالعان.
سوتتا ونىڭ رەسەيدىڭ شىعىس اسكەري وكرۋگىنە قاراستى №35390 اسكەري بولىمىندە، 39-شى جەكە گۆارديالىق موتواتقىشتار بريگاداسىنىڭ قۇرامىندا قىزمەت ەتكەنى ايتىلدى. اتالعان بريگادانىڭ تۇراقتى ورنالاسقان جەرى ساحالين وبلىسىندا.
چابىەۆ سوتتا قازاقستان شەكاراسىن زاڭسىز كەسىپ وتكەنىن مويىندادى. ونىڭ ايتۋىنشا، اسكەري قىزمەتىن جالعاستىرعىسى كەلمەگەندىكتەن جانە ءوز ومىرىنە قاۋىپ ءتونۋى مۇمكىن دەپ قاۋىپتەنگەندىكتەن بولىمنەن كەتكەن. سونداي-اق رەسەيدە سوعىس قيمىلدارىنا قاتىسۋدان جالتارعانى ءۇشىن قۋدالانىپ جاتقانىن ايتتى.
ءىس اتىراۋ قالاسىنىڭ №2 سوتىندا قارالعان كەزدە رەسەيدىڭ اسكەري تەرگەۋ ورگاندارى چابىەۆتى حالىقارالىق ىزدەۋگە بەرگەنى بەلگىلى بولعان.
سوت رەسەي ازاماتىن كىنالى دەپ تانىپ، ءبىر جىلعا باس بوستاندىعىنان ايىرۋ جازاسىن تاعايىندادى. الايدا ول راقىمشىلىق تۋرالى زاڭ نەگىزىندە جازادان بوساتىلدى.
سونىمەن بىرگە سوت چابىەۆتىڭ قازاقستان اۋماعىندا قالۋىنا رۇقسات بەرمەدى. وعان بەس جىل مەرزىمگە قازاقستاننان شىعارۋ تۇرىندەگى جازا تاعايىندالدى.
