Doneskıdegı äskeri bölımnen öz erkımen ketken Resei azamaty Qazaqstan şekarasyn zaŋsyz kesıp ötken, dep habarlaidy "Adyrna".
Ol Atyrauda bır jyldan astam uaqyt tūrǧan. 36 jastaǧy Aleksandr Chabyevtı polisiia 2026 jylǧy mausymda anyqtaǧan.
Sot materialdaryna säikes, Chabyev 2025 jyldyŋ mamyrynda Doneskıdegı äskeri bölımnen ketken. Ol Volgogradqa deiın avtostoppen jetıp, keiın Qazaqstanǧa qarai bet alǧan. Batys Qazaqstan oblysynyŋ Jänıbek audany aumaǧynda şekarany ötkızu beketınen tys jerde jaiau kesıp ötken.
Resei azamatynyŋ Qazaqstanǧa resmi türde kırgenı turaly derek bolmaǧan. Ol keiın Atyrauǧa baryp, sonda tūrǧan. Chabyev 2026 jylǧy 17 mausymda Atyrau oblysynda ekstremizmge qarsy ıs-qimyl basqarmasynyŋ qyzmetkerlerı jürgızgen tekseru barysynda anyqtalǧan.
Sotta onyŋ Reseidıŋ Şyǧys äskeri okrugıne qarasty №35390 äskeri bölımınde, 39-şy jeke gvardiialyq motoatqyştar brigadasynyŋ qūramynda qyzmet etkenı aityldy. Atalǧan brigadanyŋ tūraqty ornalasqan jerı Sahalin oblysynda.
Chabyev sotta Qazaqstan şekarasyn zaŋsyz kesıp ötkenın moiyndady. Onyŋ aituynşa, äskeri qyzmetın jalǧastyrǧysy kelmegendıkten jäne öz ömırıne qauıp tönuı mümkın dep qauıptengendıkten bölımnen ketken. Sondai-aq Reseide soǧys qimyldaryna qatysudan jaltarǧany üşın qudalanyp jatqanyn aitty.
Is Atyrau qalasynyŋ №2 sotynda qaralǧan kezde Reseidıŋ äskeri tergeu organdary Chabyevty halyqaralyq ızdeuge bergenı belgılı bolǧan.
Sot Resei azamatyn kınälı dep tanyp, bır jylǧa bas bostandyǧynan aiyru jazasyn taǧaiyndady. Alaida ol raqymşylyq turaly zaŋ negızınde jazadan bosatyldy.
Sonymen bırge sot Chabyevtyŋ Qazaqstan aumaǧynda qaluyna rūqsat bermedı. Oǧan bes jyl merzımge Qazaqstannan şyǧaru türındegı jaza taǧaiyndaldy.
