اتىراۋدا تۋىستارىن ءولتىرۋ ءىسى بويىنشا ءومىر بويىنا باس بوستاندىعىنان ايىرىلعان سۇلتان سارسەماليەۆتىڭ ايەلى اقبايان مۇقانعاليەۆا پسيحيكالىق دەنساۋلىق ورتالىعىنداعى ەمنەن كەيىن بالالارىمەن كەزدەستى، دەپ حابارلايدى "ادىرنا".
بۇل تۋرالى اتىراۋ وبلىستىق كامەلەتكە تولماعانداردى بەيىمدەۋ ورتالىعىنىڭ ديرەكتورى قۇندىز عينياتوۆا حابارلادى.
ونىڭ ايتۋىنشا، اقبايان اتىراۋ وبلىستىق پسيحيكالىق دەنساۋلىق ورتالىعىندا ەم قابىلداپ، كەيىن مەديتسينالىق مەكەمەدەن شىعارىلعان. ول بالالارىن ەكى رەت بارىپ كورگەن.
الايدا اقباياننىڭ ەمدەلۋى ءالى دە جالعاسۋى مۇمكىن. تۋىستارىنىڭ ايتۋىنشا، ول پسيحيكالىق دەنساۋلىق ورتالىعىنا قايتا بارىپ، 10 كۇن ەم قابىلداۋدى جوسپارلاپ وتىر.
قازىر اقباياننىڭ ءتورت بالاسى – 10, 8, 5 جانە 4 جاستاعى بالالار – كامەلەتكە تولماعانداردى بەيىمدەۋ ورتالىعىندا. ال ءبىر جارىم جاستاعى ۇلى مامانداندىرىلعان بوبەكتەر ۇيىندە تاربيەلەنىپ جاتىر.
ورتالىق ديرەكتورىنىڭ ايتۋىنشا، اقبايان ەمدەلۋدىڭ كەلەسى كەزەڭىنەن وتكەن سوڭ ونىڭ جاعدايى قايتا باعالانادى. ەگەر دەنساۋلىعى مۇمكىندىك بەرسە، بالالارىن ءوز قامقورلىعىنا الۋ ماسەلەسى قارالۋى مۇمكىن.
ورتالىقتا بالالاردىڭ دەنساۋلىق جاعدايى قاناعاتتانارلىق، ەموتسيونالدىق احۋالى تۇراقتى ەكەنى ايتىلدى.
ۇلكەن بالالارى وقۋىن جالعاستىرىپ جاتىر. 10 جاستاعى قىزى ءتورتىنشى سىنىپتا، 8 جاستاعى ۇلى ءۇشىنشى سىنىپتا وقيدى. مۇعالىمدەر بالالار ورنالاسقان ورتالىققا كەلىپ، ساباقتاردى بەكىتىلگەن كەستە بويىنشا وتكىزەدى.
