اتىراۋ وبلىسىنداعى ۋاقىتشا قامالعان ءار ازاماتقا كۇنىنە 1629 تەڭگەنىڭ تاماعى بەرىلەدى، دەپ حابارلايدى «ادىرنا» ءتىلشىسى goszakup.gov.kz سايتىنا سىلتەمە جاساپ.
قازاقستان رەسپۋبليكاسى ىشكى ىستەر مينيسترلىگىنە قاراستى "اتىراۋ وبلىسىنىڭ پوليتسيا دەپارتامەنتى" مەملەكەتتىك مەكەمەسى اۋداندىق پوليتسيا بولىمدەرىندە ۋاقىتشا قامالعان كۇدىكتىلەر مەن ايىپتالۋشىلارعا بيۋدجەتتىڭ اقشاسىنا ىستىق تاماق اپەرۋ ءۇشىن جىل باسىنان بەرى بىرنەشە تەندەر وتكىزگەن.
1. قىزىلقوعا اۋداندىق پوليتسيا ءبولىمى ءۇشىن ارنايى دايىن ىستىق تاماق ساتىپ الۋ، تەحنيكالىق سيپاتتاماعا سايكەس - 548 989.85 تەڭگەگە - 337 ادام (تەندەر جەڭىمپازى 12 قىركۇيەك كۇنى انىقتالادى)
2. قۇرمانعازى اۋداندىق پوليتسيا ءبولىمى ءۇشىن ارنايى دايىن ىستىق تاماق ساتىپ الۋ، تەحنيكالىق سيپاتتاماعا سايكەس - 936 703.75 تەڭگەگە - 575 ادام (جەكە كاسىپكەر "شايحانا" ۇتىپ العان)
3. يساتاي اۋداندىق پوليتسيا ءبولىمى ءۇشىن دايىن ىستىق تاماق ساتىپ الۋ، تەحنيكالىق سيپاتتاماعا سايكەس - 726 556.30 تەڭگەگە - 446 ادام (جەكە كاسىپكەر "ج.ۋايسوۆا" ۇتىپ العان)
4. جىلوي اۋداندىق پوليتسيا ءبولىمى ءۇشىن دايىن ىستىق تاماق ساتىپ الۋ، تەحنيكالىق سيپاتتاماعا سايكەس - 397 488.20 تەڭگەگە - 244 ادام (جەكە كاسىپكەر "سەكسەمباەۆا ك.ە" ۇتىپ العان)
5. يندەر اۋداندىق پوليتسيا ءبولىمى ءۇشىن دايىن ىستىق تاماق ساتىپ الۋ، تەحنيكالىق سيپاتتاماعا سايكەس - 1 032 817.70 تەڭگەگە - 634 ادام (جەكە كاسىپكەر "بەرديگاليەۆا گ" ۇتىپ العان)
6. ماقات اۋداندىق پوليتسيا ءبولىمى ءۇشىن دايىن ىستىق تاماق ساتىپ الۋ، تەحنيكالىق سيپاتتاماعا سايكەس - 542 473.65 تەڭگە - 333 ادام (جەكە كاسىپكەر "اداي" ۇتىپ العان).
تەحنيكالىق سيپاتتاما "جەتكىزىلەتىن ىستىق تاماق سايكەستىك سەرتيفيكاتى بار ازىق-تۇلىكتەردەن دايىندالۋى ءتيىس ەكەنى، توقسان سايىن دايىن ونىمگە باكتەريولوگيالىق زەرتتەۋلەر جۇرگىزىلەتىنى جازىلعان.
ۋاقىتشا قامالعان ازاماتتار قانداي تاماق ىشەدى؟ تەندەردىڭ اقشاسىنا ناننىڭ ەكى ءتۇرى، ماكارون، كۇرىش، جۇگەرى، قاراقۇمىق، سۇلى، ارپا، تارى، ارشىلعان بۇرشاق جارمالارى، كارتوپ، جاڭا پىسكەن قىرىققابات، پياز، ءسابىز، قيار، قىزاناق، قىزىلشا، تومات پاستاسى، جەمىس-جيدەك شىرىنى، جاڭا پىسكەن جەمىستەر، تسيترۋس جەمىستەرى، كەپتىرىلگەن جەمىس-جيدەكتەر، قانت، 1 ساناتتى ەت، جاڭا پىسكەن جەمىستەر (الما), تسيترۋس جەمىستەرى (ليموندار), كەپتىرىلگەن جەمىس جيدەكتەر (كەپتىرىلگەن الما), قانت (قۇمشەكەر), 1- ساناتتاعى ەت، 1 ساناتتى تاۋىق (ىشەك-قارنى جارتىلاي تازارتىلعان، 1 ساناتتى سۋبپرودۋكتىلەر (بۋىر، وكپە), باسسىز جاس بالىق (مۇزداتىلعان), تۇزدالعان بالىق (ماي شاباق), پاستەرلەنگەن ءسۇت (مايلىلىعى 2,5 %), سيىر مايى (مايلىلىعى 72 % جانە ودان جوعارى), 1- ساناتتاعى تاۋىق جۇمىرتقاسى، ت.ب تاماقتار ساتىلىپ الىناتىنى كورسەتىلگەن.
سونداي-اق، ۋاقىتشا قاماۋداعى ازاماتتارعا كۇنىنە ءۇش رەت (تاڭعى ساعات 08-30 مين. 9-30-گە دەيىن; تۇسكى اس ساعات 14-00 مين. 15-00 مين دەيىن; كەشكى اس 19.00-مين. 20-00-گە مين. دەيىن) تاماق بەرىلەدى. ياعني، ءبىزدىڭ ەسەپتەۋىمىز بويىنشا جوعارىدا كورسەتىلگەن تالاپتارعا ساي ءبىر رەت تاماقتانۋدىڭ قۇنى - 543 تەڭگەنى قۇرايدى دەگەن ءسوز.
ەندى ءبىزدى مىنا سۇراق مازالايدى... "اتىراۋ وبلىسىنىڭ پوليتسيا دەپارتامەنتى" مەملەكەتتىك مەكەمەسى جىل سوڭىنا دەيىن قىزىلقوعا اۋدانىندا - 337, قۇرمانعازى اۋدانىندا - 575, يساتاي اۋدانىندا - 446, جىلوي اۋدانىندا 244, يندەر اۋدانىندا 634, ماقات اۋدانىندا - 333 ازاماتتىڭ ۋاقىتشا قاماۋدا بولاتىنىن قايدان بىلەدى؟ بۇل سانداردان كۇدىكتى، يا ايىپتالۋشىلاردىڭ سانى اسىپ كەتسە، ولار تاماقسىز اش قالا ما؟ ءيا، جوسپارلانعان مەجەگە ادام سانى جەتپەي قالسا، ونىڭ قارجىسى بيۋدجەتكە قايتارىلا ما؟
قانات بىرلىكۇلى «ادىرنا» ۇلتتىق پورتالى
ۇقساس جاڭالىقتار
