Ozon كومپانياسى ساتۋشىلارعا تاۋارلارىن قازاقستانداعى الماتى جانە استانا قالالارىندا ورنالاسقان لوگيستيكالىق نىساندارىنا جەتكىزۋدى ۇسىندى. بۇل تۋرالى Ozon Marketplace ساتۋشىلارىنا ارنالعان Telegram-ارنادا جاريالانعان حابارلامادا ايتىلعان.
كومپانيانىڭ مالىمەتىنشە، قازاقستانداعى قويمالارعا ورنالاستىرىلعان تاۋارلاردى رەسەيدەگى كليەنتتەرگە جەتكىزۋگە بولادى. سونىمەن قاتار جەرگىلىكتى قويمالار Ozon-نىڭ قازاقستان مەن قىرعىزستانداعى ساتىپ الۋشىلارىنا تاپسىرىستاردى جىلدامىراق جەتكىزۋگە مۇمكىندىك بەرىپ، وسى نارىقتارداعى ساۋدا اينالىمىن ارتتىرۋعا ىقپال ەتەدى.
ساتۋشىلار ءۇشىن قازاقستاندا تاۋار ساقتاۋدىڭ بىرنەشە ارتىقشىلىعى كورسەتىلگەن. اتاپ ايتقاندا، جەتكىزۋگە قاتىستى شەكتەۋلەردىڭ بولماۋى جانە رەسەيگە جىبەرىلگەن تاپسىرىستاردىڭ بىرنەشە كۇن ىشىندە جەتكىزىلۋى اتاپ ءوتىلدى.
كومپانيا الماتى مەن استاناعا تاۋار جونەلتۋ كەزىندە قوسىمشا قۇجاتتاردى راسىمدەۋدىڭ قاجەتى جوق ەكەنىن مالىمدەدى. ول ءۇشىن ساتۋشىلار ادەتتەگى تارتىپپەن جەتكىزۋگە ءوتىنىم بەرىپ، قازاقستانداعى ءتيىستى كلاستەرلەردى تاڭداۋى جەتكىلىكتى.
بۇل ۇسىنىس رەسەيدەگى ءىرى ماركەتپلەيستەردىڭ لوگيستيكالىق ينفراقۇرىلىمىنا قاتىستى قيىندىقتار تۋىنداعان كەزەڭدە جاسالىپ وتىر. سوڭعى ايلاردا Ozon مەن Wildberries-ءتىڭ رەسەيدەگى بىرقاتار قويمالارى درون شابۋىلدارىنا تاپ بولدى. رەسەيدەگى لوگيستيكالىق نىساندارداعى ورتتەردەن كەيىن Wildberries قازاقستان اۋماعىنان بوس قويما ورىندارىن ىزدەي باستاعان.
بۇعان دەيىن قازاقستاننىڭ ساۋدا جانە ينتەگراتسيا مينيسترلىگى Wildberries تاراپىنان ەلدە قوسىمشا قويما قۋاتتارىن ورنالاستىرۋ جونىندە رەسمي ءوتىنىش تۇسپەگەنىن حابارلاعان. دەگەنمەن ۆەدومستۆو مۇنداي ۇسىنىس ۇلتتىق مۇددەلەر مەن قولدانىستاعى زاڭناما تالاپتارىنا ساي بولعان جاعدايدا، ونى قاراستىرۋعا دايىن ەكەنىن مالىمدەگەن.
