الەۋمەتتىك جەلىلەردە الماتىدا 500 مىڭ تەڭگەگە قۋىرشاق ساتىلاتىنى تۋرالى حابارلاندىرۋ قىزۋ تالقىعا ءتۇستى. جاريالانىمداعى قىمبات باعا مەن ءماتىن جەلى قولدانۋشىلارىنىڭ نازارىن اۋدارىپ، كەيبىر ازاماتتار حابارلاندىرۋدىڭ استارىندا جاڭا تۋعان نارەستەنى ساتۋ تۋرالى ۇسىنىس بولۋى مۇمكىن دەگەن بولجام جاساعان.
وسىعان بايلانىستى الماتى قالاسىنىڭ پوليتسياسى الەۋمەتتىك جەلىلەردە تاراعان اقپاراتتى تەكسەردى، دەپ حابارلايدى "ادىرنا".
قۇقىق قورعاۋ ورگاندارى حابارلاندىرۋدى جاريالاعان ادامدى انىقتاپ، ونىڭ ءمان-جايىن زەردەلەدى.
پوليتسيانىڭ مالىمەتىنشە، حابارلاندىرۋ اۆتورى پسيحونەۆرولوگيالىق ەسەپتە تۇرعان ەر ادام بولىپ شىققان. تەكسەرۋ بارىسىندا ونىڭ ادام ساۋداسىنا، سونىڭ ىشىندە جاڭا تۋعان نارەستەلەردى ساتۋعا قاتىسى بار ەكەنىن راستايتىن قانداي دا ءبىر دەرەك انىقتالماعان.
وسىلايشا، الەۋمەتتىك جەلى قولدانۋشىلارى اراسىندا تاراعان كۇدىك ءوز راستاۋىن تاپپادى.
الماتى پوليتسياسى ازاماتتاردى الەۋمەتتىك جەلىلەردەگى كۇماندى اقپاراتتى تاراتۋعا اسىقپاي، ونىڭ انىقتىعىن رەسمي دەرەككوزدەر ارقىلى تەكسەرۋگە شاقىرادى.
