ۋكراينانىڭ سىرتقى ىستەر ءمينيسترى رەسەي مەن ۋكراينا اراسىنداعى سوعىستى توقتاتۋ ۇدەرىسىن جەدەلدەتۋ ءۇشىن ۆلاديمير زەلەنسكي مەن ۆلاديمير ءپۋتيننىڭ كەزدەسۋى قاجەت ەكەنىن ايتتى، دەپ حابارلايدى "ادىرنا" ءتىلشىسى TRT-عا سىلتەپ.
بۇل تۋرالى ول كيەۆتە رەسمي ساپارمەن جۇرگەن ازەربايجاننىڭ سىرتقى ىستەر ءمينيسترى دجەيحۋن بايراموۆپەن وتكەن كەلىسسوزدەردەن كەيىن ۇيىمداستىرىلعان بىرلەسكەن ءباسپاسوز ءماسليحاتىندا ايتتى. اندرەي سىبيحانىڭ سوزىنشە، ۋكراينا ازەربايجانمەن ستراتەگيالىق ىنتىماقتاستىقتى دامىتۋعا ەرەكشە ءمان بەرەدى. ول ەنەرگەتيكا سالاسىنداعى ارىپتەستىكتى كەڭەيتۋگە، سونداي-اق «ورتالىق ءدالىز» جوباسى اياسىنداعى ءوزارا بايلانىستى نىعايتۋعا مۇددەلى ەكەنىن جەتكىزدى.
مينيستر ۋكراينا مەن ازەربايجاننىڭ ءبىر-ءبىرىنىڭ ەگەمەندىگى مەن اۋماقتىق تۇتاستىعىن ءوزارا قولدايتىنىن اتاپ ءوتتى. سونىمەن قاتار قارا تەڭىزدەگى شابۋىلدار سالدارىنان ازەربايجان ازاماتتارىنىڭ قازا تاۋىپ، زارداپ شەككەنىنە بايلانىستى كوڭىل ايتىپ، بۇل جاعدايعا رەسەيدىڭ اسكەري ارەكەتتەرى سەبەپ بولعانىن مالىمدەدى.
سىبيحا سونداي-اق اقش، ۋكراينا جانە رەسەي قاتىساتىن كەلىسسوزدەر فورماتىنا توقتالىپ، كيەۆ اقش دەلەگاتسياسىنىڭ كەلۋىن كۇتىپ وتىرعانىن ايتتى.
«بەيبىتشىلىككە قول جەتكىزۋ ءۇشىن بارلىق مۇمكىندىكتى پايدالانعىمىز كەلەدى. مەنىڭ ويىمشا، بۇل ۇدەرىسكە ناقتى سەرپىن بەرە الاتىن جالعىز قادام – ۆلاديمير زەلەنسكي مەن ۆلاديمير ءپۋتيننىڭ تىكەلەي كەزدەسۋى»، – دەدى ۋكراينا سىرتقى ساياسات ۆەدومستۆوسىنىڭ باسشىسى.
