مىندەتتى الەۋمەتتىك مەديتسينالىق ساقتاندىرۋ ء(مامس) جۇيەسىندە 2026 جىلدىڭ ءبىرىنشى جارتىجىلدىعىندا مەديتسينالىق ۇيىمدارعا تولەم جاسالعانعا دەيىن 4 ملرد تەڭگەدەن استام اقاۋ انىقتالدى، دەپ حابارلايدى "ادىرنا".
بۇل تۋرالى ۇكىمەتتىڭ ءباسپاسوز قىزمەتى حابارلادى. اقاۋلاردى انتيفرود جۇيەسى انىقتاعان. ياعني ىقتيمال نەگىزسىز تولەمدەر مەديتسينالىق ۇيىمدارعا قاراجات اۋدارىلعانعا دەيىن بۇعاتتالادى. ءمامس رەفورماسى اياسىندا تولەمدەردى باقىلاۋ پرەۆەنتيۆتى فورماتقا كوشىرىلىپ جاتىر. بۇعان دەيىن باقىلاۋ تولەم جاسالعاننان كەيىن جۇرگىزىلسە، قازىر قارجى اۋدارىلماي تۇرىپ تەكسەرىلەدى. 2026 جىلدىڭ قاڭتارىنان باستاپ الەۋمەتتىك مەديتسينالىق ساقتاندىرۋ قورى قارجى مينيسترلىگىنىڭ قاراماعىنا بەرىلدى. اقپان ايىنان باستاپ قارجىلاندىرۋدى باسقارۋدىڭ بىرىڭعاي تسيفرلىق كونتۋرىنا كوشۋ جۇمىستارى جۇرگىزىلۋدە.
مەديتسينالىق كومەكتى جوسپارلاۋ، ساتىپ الۋ، باقىلاۋ جانە تولەۋ پروتسەستەرى Qalqan تسيفرلىق پلاتفورماسىنا كەزەڭ-كەزەڭىمەن كوشىرىلىپ جاتىر. قازىر پلاتفورما 207 كلينيكادا پيلوتتىق رەجيمدە سىناقتان وتۋدە. ونىڭ كومەگىمەن مەديتسينالىق كومەكتىڭ 92 ءتۇرىنىڭ 20-سى بويىنشا تولەم جۇزەگە اسىرىلىپ، تاعى 60 ءتۇرى بويىنشا تەستىلەۋ جۇرگىزىلۋدە. جىل سوڭىنا دەيىن مەديتسينالىق كومەكتىڭ بارلىق ءتۇرىن پلاتفورمادا ونەركاسىپتىك پايدالانۋعا بەرۋ جوسپارلانعان.
