قازاقستاندا جۇرگىزۋشىلەردىڭ اي-95 جانە اي-98 بەنزينىنىڭ ساپاسىنا قاتىستى شاعىمدارىنان كەيىن وتىننىڭ ساپاسى تەكسەرىلىپ جاتىر، دەپ حابارلايدى “ادىرنا” ءتىلشىسى.
بىرقاتار جۇرگىزۋشى جەلىدە اي-95 جانە اي-98 بەنزينىن قۇيعاننان كەيىن كولىكتەرىندە اقاۋ پايدا بولعانىن ايتىپ، شاعىمدانعان. وسىدان كەيىن وتىن ساپاسىنا قاتىستى تەكسەرۋ باستالدى.
تەكسەرىستى ساۋدا جانە ينتەگراتسيا مينيسترلىگىنە قاراستى تەحنيكالىق رەتتەۋ جانە مەترولوگيا كوميتەتىنىڭ اۋماقتىق دەپارتامەنتى جۇرگىزۋدە.
ماماندار بەنزيندى ءۇش نەگىزگى كەزەڭدە زەرتتەيدى:
– پاۆلودار مۇناي-حيميا زاۋىتى;
– مۇناي بازالارى;
– جانارماي قۇيۋ ستانتسيالارى.
قازىردىڭ وزىندە الماتىداعى 5, الماتى وبلىسىنداعى 5, اباي وبلىسىنداعى 6 جانە جامبىل وبلىسىنداعى 1 ازس-دان باقىلاۋ ءۇشىن بەنزين ۇلگىلەرى الىنعان. بارلىعى – 17 جانارماي قۇيۋ ستانتسياسى.
سونىمەن قاتار اربيتراجدىق سىنامالار تاۋەلسىز زەرتحاناعا جىبەرىلدى. Sinoil, QazaqOil جانە Helios جەلىلەرىندەگى قوسپالارى بار بەنزين دە جەكە زەرتتەلەدى.
مينيسترلىككە بەنزين ساپاسىنا قاتىستى 12 ازاماتتىڭ ءوتىنىشى تۇسكەن. ونىڭ 9-ى استانادان، 1-ەۋى پاۆلوداردان جانە 2-ەۋى سولتۇستىك قازاقستان وبلىسىنان تۇسكەنى انىقتالدى.
ەگەر تەكسەرۋ بارىسىندا بەنزيننىڭ تەحنيكالىق رەگلامەنت تالاپتارىنا سايكەس كەلمەيتىنى انىقتالسا، ونى ساتۋعا تىيىم سالىنىپ، ساپاسىز جانار-جاعارماي ماتەريالدارى اينالىمنان الىنۋى مۇمكىن.
