Armeniia premer-ministrı Nikol Paşinian Qazaqstan men Qyrǧyzstanǧa TRIPP jobasynyŋ aksionerı boludy ūsyndy. Būl mäsele Armeniia premer-ministrı Nikol Paşinian men Qazaqstan prezidentı Qasym-Jomart Toqaevtyŋ telefon arqyly söilesuı barysynda talqylandy, dep habarlaidy «Adyrna» tılşısı open.kg-ǧa sılteme jasap.
Būl — Armeniia aumaǧy arqyly Äzerbaijan men Nahchyvandy bailanystyruy tiıs kölık dälızı. Bastapqy kezeŋde AQŞ-pen bırlesıp jüzege asyrylyp jatqan TRIPP — «Halyqaralyq beibıtşılık pen örkendeu üşın Tramp baǧyty» jobasynyŋ 26 paiyzdyq ülesıne ie boluy tiıs. Erevan osy ülestıŋ 5 paiyzyn Qazaqstanǧa, taǧy 5 paiyzyn Qyrǧyzstanǧa beruge daiyn.
Osylaişa Qazaqstan men Qyrǧyzstan jaŋa kölık dälızınıŋ jai ǧana qatysuşysy emes, onyŋ aksionerıne ainaluy mümkın.
Telefon arqyly söilesu barysynda taraptar Armeniianyŋ temırjoldaryn basqarudy Qazaqstan tarapyna beru mümkındıgın de talqylady. Astana būl salada belsendırek röl atqara alatyn äleuettı serıktes retınde qarastyrylyp otyr.
Äŋgıme qorytyndysy boiynşa Qasym-Jomart Toqaev qazan aiynda Armeniiaǧa resmi saparmen baru nietın rastady.
TRIPP jobasy AQŞ-tyŋ araǧaiyndyǧymen jüzege asyrylyp jatyr. Ol Armeniia aumaǧy arqyly ötetın jäne Äzerbaijannyŋ negızgı bölıgın Nahchyvan Avtonomiialyq Respublikasymen bailanystyratyn kölık dälızın qūrudy közdeidı. Joba Parsy şyǧanaǧy men Qara teŋız öŋırlerı arasynda temırjol qatynasyn aşuy mümkın keŋırek kölık baǧytynyŋ bır bölıgı retınde de qarastyrylyp otyr.
Būǧan deiın aitylǧan aqparatqa säikes, jobany jüzege asyrumen amerikalyq kompaniia ainalysuy tiıs. Oǧan infraqūrylymdy 99 jylǧa deiın basqaruǧa airyqşa qūqyq berıluı mümkın.
Qyrǧyzstan üşın TRIPP jobasyna yqtimal qatysu, eŋ aldymen, Euraziiadaǧy kölık jäne sauda bailanystaryn keŋeitu tūrǧysynan maŋyzdy. Alaida äzırge būl tek Armeniia tarapynyŋ ūsynysy bolyp otyr. Qyrǧyzstannyŋ joba aksionerlerınıŋ qataryna qosyluǧa kelısımı turaly resmi aqparat jariialanǧan joq.
