ورىنبور گاز وڭدەۋ زاۋىتىنا جاسالعان درون شابۋىلىنان كەيىن ونىڭ جۇمىسى ۋاقىتشا توقتاتىلعانىمەن، بۇل جاعداي قازاقستانعا گاز جەتكىزۋگە اسەر ەتكەن جوق ەكەنى ايتىلدى، دەپ حابارلايدى "ادىرنا" ۇلتتىق پورتالى.
بۇل تۋرالى قر ەنەرگەتيكا مينيسترلىگى حابارلادى.
ۆەدومستۆونىڭ مالىمەتىنشە، الەۋمەتتىك جەلىلەر مەن كەيبىر باق-تا تاراعان استانا مەن وزگە وڭىرلەردە گاز تاپشىلىعى تۋىنداۋى مۇمكىن دەگەن اقپارات شىندىققا جاناسپايدى.
«گازبەن جابدىقتاۋ تولىق كولەمدە، شتاتتىق رەجيمدە جانە ەشقانداي شەكتەۋسىز جۇزەگە اسىرىلىپ جاتىر»، – دەلىنگەن مينيسترلىك حابارلاماسىندا.
ەنەرگەتيكا مينيسترلىگى اتاپ وتكەندەي، گاز جەتكىزۋدىڭ تۇراقتىلىعى الدىن الا قاراستىرىلعان رەزەرۆتىك تەتىكتەر ەسەبىنەن قامتاماسىز ەتىلۋدە. بارلىق جەتىسپەيتىن كولەمدەر قولدانىستاعى كەلىسىمشارتتار اياسىندا جەدەل تۇردە تولىقتىرىلادى. سوندىقتان ىشكى نارىقتاعى تۇتىنۋشىلار، سونىڭ ىشىندە ەلورداداعى جەو-لار ءۇشىن گاز تاپشىلىعى جوق جانە بولجانبايدى.
ورىنبور گوز-ءى الداعى ۋاقىتتا قازاقستاندىق گازدى قابىلداۋدى قايتا باستايدى دەپ كۇتىلۋدە. ال ازىرگە قاراشىعاناق كەن ورنىنداعى وپەراتور ءوندىرىس كولەمىن ۋاقىتشا شەكتەۋلى تۇردە ازايتقان.
«بۇل شارا قازاقستاننىڭ ىشكى نارىعىنا گاز جەتكىزۋ مىندەتتەمەلەرىنە اسەر ەتپەيدى. زاۋىت جۇمىسى تولىق قالپىنا كەلگەن سوڭ ءوندىرىس جوسپارلى كورسەتكىشتەرگە قايتا ورالادى»، – دەلىنگەن مينيسترلىك حابارلاماسىندا.
Reuters اگەنتتىگىنىڭ دەرەگىنشە، ورىنبور زاۋىتىنىڭ توقتاۋىنان كەيىن قاراشىعاناقتا مۇناي مەن گاز كوندەنساتىن ءوندىرۋ كولەمى 25–30 پايىزعا ازايعان.
