ۆاشينگتون مەن تەگەران اتىستى توقتاتۋعا كەلىستى دەگەن اقپارات تارادى. بۇل تۋرالى ريا نوۆوستي اگەنتتىگىنە پاكىستاننىڭ اسكەري ورتاسى مەن يراننىڭ قاۋىپسىزدىك ورگاندارىنداعى دەرەككوزدەر مالىمدەگەن، دەپ حابارلايدى «ادىرنا» ءتىلشىسى.
«اتىستى توقتاتۋ تۋرالى كەلىسىم جاسالدى. ول ورمۇز بۇعازىندا ەركىن ناۆيگاتسيانى قامتاماسىز ەتۋدى كوزدەيدى»، – دەگەن اگەنتتىككە سۇحبات بەرگەندەر.
ولاردىڭ مالىمەتىنشە، ءبىتىم تۋرالى رەسمي تۇردە الداعى كۇندەرى جاريالانۋى مۇمكىن. وسىدان كەيىن تاراپتار كەلىسسوزدەر وتكىزىپ، بىرنەشە كەزەڭنەن تۇراتىن تەحنيكالىق كونسۋلتاتسيالار جۇرگىزۋدى جوسپارلاپ وتىر.
اقش پەن يران بيلىگى ازىرگە كەلىسىمگە قول جەتكىزىلگەنىن رەسمي تۇردە راستاعان جوق.
بۇعان دەيىن وماننىڭ سىرتقى ىستەر ءمينيسترى بادر ءال-بۋسايدي يران تاراپىمەن جۇرگىزىلىپ جاتقان كەلىسسوزدەردە ىلگەرىلەۋ بارىن حابارلاعان ەدى.
ماۋسىم ايىنىڭ ورتاسىندا اقش پەن يران بەيبىت كەلىسىمگە دايىندىق پروتسەسىن باستاۋعا ءتيىس مەموراندۋمعا قول قويعان بولاتىن. الايدا بىرنەشە اپتادان كەيىن جاعداي قايتا ۋشىقتى. ۆاشينگتون تەگەراندى ورمۇز بۇعازىندا كوممەرتسيالىق كەمەلەرگە شابۋىل جاسادى دەپ ايىپتاپ، تاراپتار ءوزارا سوققى الماسۋدى قايتا باستادى.
سوڭعى اپتالاردا تاياۋ شىعىستاعى دەلدالدار اقش پەن يرانعا جاڭا كەلىسىمنىڭ شارتتارىن كەلىسۋگە كومەكتەسۋگە تىرىسىپ جاتىر. اقش پرەزيدەنتى دونالد ترامپ بۇعان دەيىن ۆاشينگتوننىڭ تەگەرانمەن كەلىسسوزدەردى جالعاستىرىپ جاتقانىن، سونىمەن بىرگە يسلام رەسپۋبليكاسىنا ەكونوميكالىق قىسىمدى كۇشەيتىپ وتىرعانىن مالىمدەگەن.
سونداي-اق اقش پرەزيدەنتى يرانعا قارسى ەكونوميكالىق وپەراتسيانىڭ باستالعانىن جاريالاپ، وداقتاستارىن ەلدى وقشاۋلاۋعا قوسىلۋعا شاقىردى. يراننىڭ سىرتقى ىستەر ءمينيسترى ابباس اراكچي ترامپتىڭ مالىمدەمەسىن اقش-تاعى ىشكى ماسەلەلەردەن قوعام نازارىن باسقا جاققا بۇرۋ ارەكەتى دەپ اتادى.
