بۇگىن، 25 تامىزدان باستاپ قازاقستاندا ەلەكترلى ساموكاتتار مەن قوزعالتقىشى بار ۆەلوسيپەدتەردى پايدالانۋ ءتارتىبى وزگەرەدى، دەپ حابارلايدى "ادىرنا" ءتىلشىسى.
ءتيىستى وزگەرىستەر «جول ءجۇرىسى تۋرالى» زاڭعا ەنگىزىلگەن تۇزەتۋلەرگە بايلانىستى كۇشىنە ەندى. ەندى جەكە جانە جالعا الىنعان ەلەكتروساموكاتتارمەن تەك ۆەلوجولاقتا نەمەسە جولدىڭ شەتىمەن جۇرۋگە رۇقسات ەتىلەدى. جولعا شىعاتىن ساموكات جۇرگىزۋشىسىندە شلەم جانە كەز كەلگەن ساناتتاعى جۇرگىزۋشى كۋالىگى بولۋى قاجەت. قاراڭعى ۋاقىتتا جارىق شاعىلىستىراتىن جيلەت نەمەسە ارنايى كيىم كيۋ مىندەتتى.
ال گيروسكۋتەر، سيگۆەي، ەلەكتروموتوسكەيتبورد، مونودوڭگەلەك سەكىلدى شاعىن ەلەكتر كولىك قۇرالدارىمەن جاياۋ جۇرگىنشىلەر جولىندا جۇرۋگە بولادى. ساموكاتتاردىڭ تروتۋارمەن جۇرۋىنە جەرگىلىكتى اتقارۋشى ورگان ارنايى رۇقسات بەرە الادى. سونىمەن قاتار 25 تامىزدان باستاپ قوزعالتقىشى بار، ياعني ەلەكتر نەمەسە بەنزين قوزعالتقىشىمەن جابدىقتالعان ۆەلوسيپەدتەر موپەدتەرگە تەڭەستىرىلەدى. سوندىقتان ولاردى تروتۋار مەن ۆەلوجولاقتا جۇرگىزۋگە بولمايدى. مۇنداي كولىكتەر مەملەكەتتىك تىركەۋدەن ءوتىپ، ءنومىر الۋى جانە مىندەتتى ساقتاندىرىلۋى ءتيىس. باسقارۋ ءۇشىن ا1 ساناتىنداعى جۇرگىزۋشى كۋالىگى قاجەت.
