ءماجىلىس تۇرمىستىق زورلىق-زومبىلىق كورسەتكەندەرگە جانە پەدوفيلدەرگە قاتىستى جاڭا قاتاڭ زاڭ جوباسىن ماقۇلدادى، دەپ حابارلايدى "ادىرنا" ۇلتتىق پورتالى.
«كامەلەتكە تولماعان بالانى ولتىرگەنى جانە پەدوفيليا ءۇشىن ولار ءومىر بويىنا باس بوستاندىعىنان ايىرىلادى. ءماجىلىس ايەلدەر مەن بالالاردىڭ قۇقىقتارى مەن زاڭدى مۇددەلەرىن قورعاۋعا باعىتتالعان زاڭنامالىق تۇزەتۋلەردى ءبىرىنشى وقىلىمدا ماقۇلدادى. زاڭ جوبالارىن ءماجىلىس دەپۋتاتتارى مەملەكەت باسشىسىنىڭ قازاقستان حالقىنا جولداۋىندا ايتىلعان تاپسىرمالارىن ىسكە اسىرۋ ماقساتىندا ازىرلەدى»، - دەلىنگەن سارسەنبى كۇنى تاراتقان حابارلامادا.
زاڭنامالىق تۇزەتۋلەر 5 باعىتتى قامتيدى. اتالمىش جوبانى سارسەنبى كۇنى ءماجىلىس مىنبەرىندە دەپۋتات جۇلدىز سۇلەيمەنوۆا قورعادى.
بىرىنشىدەن، قىلمىستىق جاۋاپكەرشىلىك قالپىنا كەلتىرىلەدى:
–دەنساۋلىققا قاساقانا جەڭىل زيان كەلتىرۋ – 200 اەك دەيىنگى مولشەردە ايىپپۇل سالۋعا نە سول مولشەردە تۇزەۋ جۇمىستارىنا نە 200 ساعاتقا دەيىنگى مەرزىمگە قوعامدىق جۇمىستارعا تارتۋعا نە 50 تاۋلىككە دەيىنگى مەرزىمگە قاماۋعا الۋعا جازالانادى;
– زورلىق-زومبىلىق جاساعانى ءۇشىن – 80 اەك-كە دەيىنگى مولشەردە ايىپپۇل سالۋ نەمەسە 80 ساعاتقا دەيىن قوعامدىق جۇمىستارعا تارتۋ، نە 25 تاۋلىككە دەيىن قاماۋعا الۋ.
"تۇرمىستىق زورلىق-زومبىلىق ءۇشىن اكىمشىلىك جانە قىلمىستىق جاۋاپكەرشىلىك كۇشەيتىلدى. بىراق وسىعان قاراماستان، زورلىق-زومبىلىقتىڭ تولاستاماۋى ايەلدەردىڭ قۇقىعىن قورعاۋ، بالالاردىڭ قاۋىپسىزدىگىن ساقتاۋ زاڭناماسىن قاتاڭداتۋمەن بىرگە، قوعامدا قىلمىسقا مۇلدەم توزبەۋشىلىك ءپرينتسيپى، زاڭ مەن ءتارتىپتىڭ قاتاڭ ساقتالۋى دارىپتەلىپ، ناسيحاتتالۋىن قاجەت ەتەدى. سول كەزدە قابىلدانعان زاڭدار ساپالى ورىندالاتىن بولادى. زاڭ مەن ءتارتىپ قاعيداتى قازاقستان قوعامىنىڭ يدەولوگيالىق تەمىرقازىعىنا اينالۋعا ءتيىس دەپ ويلايمىن" دەدى سۇلەيمەنوۆا.
