الاكولدە بىرنەشە كۇن بويى ىزدەۋدە بولعان 44 جاستاعى ەر ادامنىڭ دەنەسى تابىلدى، دەپ حابارلايدى “ادىرنا” ءتىلشىسى.
ەر ادام الاكولگە جۇبايى، ءۇش بالاسى جانە اكەسىمەن بىرگە دەمالۋعا كەلگەن. 17 تامىز كۇنى كەشكى ۋاقىتتا ول «سەرۋەندەپ كەلەمىن» دەپ دەمالىس ورنىنان شىعىپ، قايتا ورالماعان.
تۋىستارىنىڭ ايتۋىنشا، ول كولگە شومىلماعان. بەينەباقىلاۋ كامەرالارىنان ونىڭ اربات ماڭىندا جۇرگەنى انىقتالعان. كەيىن ونىڭ ۇيالى تەلەفونى ءوشىپ قالعان. تەلەفوندى جەرگىلىكتى ءجاسوسپىرىم الاكول جاعالاۋىنان تاۋىپ، دەمالىس ورنىنىڭ كۇزەتشىسىنە تاپسىرعان.
ەر ادامدى ىزدەۋ جۇمىستارى 18 تامىزدا باستالعان. ىزدەۋگە پوليتسيا قىزمەتكەرلەرى، توتەنشە جاعدايلار قىزمەتىنىڭ ماماندارى، اسكەري قىزمەتشىلەر مەن ەرىكتىلەر جۇمىلدىرىلدى. سونىمەن قاتار ارنايى كولىكتەر مەن دروندار قولدانىلعان.
بىرنەشە كۇنگە سوزىلعان ىزدەۋ بارىسىندا ەر ادامنىڭ دەنەسى دەمالىس ورىندارىنان شامامەن 200 مەتر قاشىقتىقتاعى قالىڭ اعاشتاردىڭ اراسىنان تابىلدى.
اباي وبلىسىنىڭ پوليتسيا دەپارتامەنتى اتالعان فاكتى بويىنشا سوتقا دەيىنگى تەرگەۋ باستالعانىن حابارلادى.
قازىر وقيعانىڭ بارلىق ءمان-جايى انىقتالىپ جاتىر.
