بۇعان دەيىن ازەربايجانعا قارسى سيپاتتاعى مالىمدەمەلەر جاساعان رەسەي كولىك ءمينيسترىنىڭ كەڭەسشىسى الەكسەي چاداەۆ قىزمەتىنەن كەتەتىنىن مالىمدەدى. بۇل تۋرالى بۇرىنعى شەنەۋنىك ءوزىنىڭ Telegram-ارناسىندا جازدى، دەپ حابارلايدى «ادىرنا» ءتىلشىسى.
«رەسەي كولىك ءمينيسترىنىڭ كەڭەسشىسى رەتىندەگى وكىلەتتىگىمدى توقتاتۋ تۋرالى شەشىم قابىلدادىم»، – دەدى ول.
ەسكە سالايىق، 17 تامىزدا ازەربايجاننىڭ باس پروكۋراتۋراسى تەرروريزمگە ۇندەدى دەگەن ايىپپەن رەسەيدىڭ ءۇش ازاماتىن حالىقارالىق ىزدەۋگە جاريالاعان بولاتىن. ولاردىڭ قاتارىندا «موسكۆا 24» تەلەارناسىنىڭ جۇرگىزۋشىسى ءارى جۋرناليست يۆان كنيازەۆ، ءوزىن رەسەيدە ساياسي كونسۋلتانت جانە مەديا-ساراپشى رەتىندە تانىستىراتىن سەمەن ۋرالوۆ، سونداي-اق تەلەجۋرناليست جانە ءتىلشى رەتىندە قىزمەت اتقاراتىن رەسەي كولىك ءمينيسترىنىڭ كەڭەسشىسى الەكسەي چاداەۆ بولعان.
ازەربايجان باس پروكۋراتۋراسىنىڭ مالىمەتىنشە، ەلدىڭ كونستيتۋتسيالىق قۇرىلىسىن كۇشپەن وزگەرتۋگە، اۋماقتىق تۇتاستىعىن بۇزۋعا، ۇلتتىق ارازدىق پەن وشپەندىلىكتى قوزدىرۋعا، سونداي-اق تەرروريزمگە جاريا تۇردە شاقىرۋ فاكتىلەرى بويىنشا قوزعالعان قىلمىستىق ءىس اياسىندا الدىن الا تەرگەۋ جۇرگىزىلىپ جاتىر.
18 تامىزدا ازەربايجان سىرتقى ىستەر مينيسترلىگى رەسەيدىڭ ەلدەگى ەلشىسى ميحايل ەۆدوكيموۆتى شاقىرىپ، رەسەي بۇقارالىق اقپارات قۇرالدارىندا ازەربايجان مەن ونىڭ باسشىلىعىنا قاتىستى ايتىلعان ارانداتۋشىلىق مالىمدەمەلەرگە بايلانىستى قاتاڭ نارازىلىق بىلدىرگەن.
