استانادا فەلدشەر ۇلدانا مىرزۋاننىڭ ولىمىنە قاتىستى سوت پروتسەسى باستالدى، دەپ حابارلايدى "ادىرنا" ءتىلشىسى.
مارقۇمنىڭ كۇيەۋى ادىلەت زەينەل جابىرلەنۋشى مارتەبەسىنەن باس تارتپاق. سوت وتىرىسى بارىسىندا ونىڭ ادۆوكاتى وسىنداي اقپاراتتى حابارلادى. ءىس بويىنشا سوت پروتسەسى استانادا ءوتىپ جاتىر. وتىرىستا تاراپتاردىڭ قۇقىقتىق مارتەبەسى مەن سوت تالقىلاۋىنا قاتىستى ماسەلەلەر قارالدى.
ۇلدانا مىرزۋان 2025 جىلعى قاراشادا استانادا تۇرعىن ءۇي عيماراتىنىڭ قاسبەتى قۇلاعان كەزدە زارداپ شەككەن. قوعامدىق دەنساۋلىق ساقتاۋ باسقارماسىنىڭ مالىمەتىنشە، 8 قاراشادا عيماراتتان قۇلاعان كونديتسيونەر فەلدشەردى اۋىر جاراقاتتاعان. ۇلدانا تۇرعىندارعا كومەك كورسەتۋگە ۇمتىلعان كەزدە جاراقات العان. دارىگەرلەر ونىڭ ءومىرىن ساقتاپ قالۋعا تىرىسقانىمەن، 18 قاراشادا 23 جاستاعى فەلدشەر قايتىس بولدى.
قايعىلى وقيعادان كەيىن ونىڭ كۇيەۋى ادىلەت زەينەل كىنالىلەردىڭ جاۋاپقا تارتىلۋىن تالاپ ەتكەن ەدى. ارادا بىرنەشە اي وتكەن سوڭ ادىلەت زەينەلدىڭ قايتا ۇيلەنگەنى تۋرالى اقپارات الەۋمەتتىك جەلىلەردە تارادى. بۇل قوعامدا ءتۇرلى پىكىر تۋعىزدى. بىرقاتار قولدانۋشى ونىڭ قىسقا ۋاقىت ىشىندە قايتا وتباسىن قۇرۋىنا قاتىستى پىكىر بىلدىرسە، ەندى ءبىرى ازاماتتىڭ جەكە ومىرىنە ارالاسپاۋعا شاقىردى.
الەۋمەتتىك جەلىلەردە ونىڭ قازىرگى جۇبايىنا قاتىستى دا ءتۇرلى اقپارات تاراعان. كەيىنىرەك ادىلەت زەينەلدىڭ ءوزى بۇل اقپاراتتى راستادى.
قازىر باستى نازار ۇلدانا مىرزۋاننىڭ ولىمىنە قاتىستى قىلمىستىق ءىستىڭ سوتتا قارالۋىنا اۋدارىلىپ وتىر.
