تالدىقورعان قالاسىندا 16 جاستاعى شەرزات پولاتتىڭ قازاسىنا قاتىستى قىلمىستىق ءىس بويىنشا الدىن الا سوت تىڭداۋى وتەدى، دەپ حابارلايدى "ادىرنا" ۇلتتىق پورتالى.
بۇل ءىس بويىنشا الماتى وبلىسىنىڭ سوتى جاۋاپتى بولعانىمەن، سوت پروتسەسى جەتىسۋ وبلىسى قىلمىستىق ىستەر جونىندەگى مامانداندىرىلعان اۋدانارالىق سوت عيماراتىندا ۇيىمداستىرىلىپ وتىر. جوعارعى سوت مۇنى ايىپتالۋشىلاردىڭ تالدىقورعانداعى تەرگەۋ يزولياتورىندا وتىرعانىمەن بايلانىستىردى.
سوت وتىرىسى تۇسكى ساعات 12:00-دە باستالادى. ءىس اشىق فورماتتا قارالادى. سۋديا ە.س. جانۇزاقوۆ توراعالىق ەتەدى.
ىسكە بايلانىستى توعىز ادام ايىپتالۋشى رەتىندە تانىلىپ وتىر. تەرگەۋ بارىسىندا بارلىعى 11 كۇدىكتى ۇستالعان، الايدا ولاردىڭ ەكەۋى كۋاگەر رەتىندە بوساتىلعان. قىلمىستىق ءىس "ادام ءولتىرۋ", "بۇزاقىلىق", "قورقىتۋ" جانە "قىلمىس تۋرالى حابار بەرمەۋ" باپتارى بويىنشا قارالۋدا.
الماتى وبلىسىنىڭ پوليتسياسى تەرگەگەن ءىس 62 تومنان تۇرادى. ىشىندە 40 سوت ساراپتاماسى، 200-گە جۋىق كۋاگەردىڭ جاۋابى جانە سەگىز ۆيدەوماتەريال بار.
جابىرلەنۋشى تاراپتى ادۆوكات مەيىرمان شەكەەۆتىڭ كەڭسەسى قورعايدى. قورعاۋشىلار قاتارىندا جاندوس پالمانوۆ، ءالىم مۇستافاەۆ، دينا دوساەۆا، نۇربولات ىبراەۆ، باعدات اماندوسۇلى جانە بەكزات ميازوۆ بار.
ەسكە سالساق، شەرزات پولات 2024 جىلعى 4 قازاندا الماتى وبلىسى تالعار قالاسىندا «قاماجاي» دۇكەنىنىڭ الدىندا قارۋلى قاقتىعىس كەزىندە پىشاقتالىپ، كوز جۇمدى. قايعىلى وقيعا ءجاسوسپىرىمنىڭ اتا-اناسىنىڭ كوز الدىندا بولعان.
وسى وقيعادان كەيىن، 7 قازاندا مارقۇمنىڭ تۋىستارى اۋدان اكىمدىگىنىڭ الدىنا جينالىپ، تەرگەۋدىڭ ءادىل ءوتۋىن تالاپ ەتتى. قوعامدا ۇلكەن رەزونانس تۋدىرعان بۇل ءىس ىشكى ىستەر مينيسترلىگىنىڭ باقىلاۋىنا الىندى.
