قازاقستان مەكتەپتەرىندە وقۋشىلاردىڭ ساباق كەزىندە سمارتفون پايدالانۋىنا شەكتەۋ قويىلدى، دەپ حابارلايدى "ادىرنا" ۇلتتىق پورتالى.
الايدا ءۇزىلىس ۋاقىتىندا ۇيالى تەلەفون قولدانۋعا رۇقسات بەرىلۋى مۇمكىن. بۇل تۋرالى وقۋ-اعارتۋ ۆيتسە-ءمينيسترى شىنار اقپاروۆا ۇكىمەتتەگى بريفينگتە حابارلادى.
ۆيتسە-ءمينيستردىڭ ايتۋىنشا، جاڭا تالاپتارعا سايكەس وقۋشىلار وقۋ پروتسەسى كەزىندە ۇيالى تەلەفون پايدالانباۋى كەرەك. ەرەكشەلىك وقۋ باعدارلاماسىندا جانە قىسقا مەرزىمدى ساباق جوسپارىندا سمارتفوندى وقۋ ماقساتىندا پايدالانۋعا رۇقسات بەرىلگەن جاعدايلارعا قاتىستى.
«ەرەجەلەردە بالالاردىڭ وقۋ پروتسەسى كەزىندە، قىسقا مەرزىمدى جوسپاردا كوزدەلگەن، ياعني وقۋ باعدارلاماسى نەگىزىندە رۇقسات ەتىلگەن جاعدايلاردى قوسپاعاندا، ۇيالى تەلەفونداردى پايدالانبايتىنى بەلگىلەنگەن»، – دەدى شىنار اقپاروۆا.
ونىڭ ايتۋىنشا، ءۇزىلىس كەزىندە سمارتفون قولدانۋعا مۇمكىندىك بار. دەگەنمەن بۇل ماسەلەنى ءار ءبىلىم بەرۋ ۇيىمى ءوز ىشكى ءتارتىبى ارقىلى رەتتەيدى.
«بۇل مۇمكىن. بىرىڭعاي تالاپتار ازىرلەندى. وسى تالاپتار نەگىزىندە ءبىلىم بەرۋ ۇيىمى بارلىق ۇيىمداستىرۋ ماسەلەسىن ءوزىنىڭ ىشكى تارتىبىمەن رەتتەيدى»، – دەدى ۆيتسە-مينيستر.
سونىمەن قاتار مەكتەپتەر وقۋشىلاردىڭ ۇيالى تەلەفوندارىن ساباق كەزىندە قايدا جانە كىمگە تاپسىراتىنىن وزدەرى انىقتايدى.
«مۇنىڭ ءبارى مەكتەپتەردىڭ ىشكى ەرەجەلەرىندە ناقتىلانادى. مۇمكىن، سىنىپتا ارنايى ورىن بولادى، مۇمكىن، جەكە جاشىكتەر قويىلادى. مۇنى ءبىلىم بەرۋ ۇيىمى ءوزى انىقتايدى»، – دەپ ءتۇسىندىردى شىنار اقپاروۆا.
