Иран билігі елдегі интернет-ресурстарға қойылған шектеулерді жою мәселесін көтерді, деп хабарлайды "Адырна" тілшісі РИА-ға сілтеп.
Бұл туралы Иранның бірінші вице-президенті Мұхаммад-Реза Ареф хабарлаған.
Арефтің айтуынша, Иран президенті Масуд Пезешкиан интернеттегі бұғаттауларға қатысты мәселені шешу туралы шешім қабылдаған.
«Президент бұғаттауларға қатысты мәселе шешілуі керек деген шешім қабылдады. Алайда әртүрлі ұйымдар мен құқықтық инстанцияларға байланысты бұл процесс уақыт алады. Дегенмен біртіндеп бұғаттаулар мәселесі шешіледі», – деді вице-президент. Ол интернеттегі шектеулер елдің қауіпсіздігіне қауіп төндіретін әрекеттерге қарсы тұру қажеттілігімен байланысты екенін атап өтті. Алайда Арефтің пікірінше, интернетті жаппай бұғаттау күткен нәтижені бермей отыр.
Вице-президенттің айтуынша, шектеулердің енгізілуі азаматтардың бұғаттауларды айналып өтуге арналған түрлі құралдарды жаппай пайдалануына әкелген. Оның пікірінше, бұл жағдайдың өзі ел қауіпсіздігіне қосымша қауіп төндіруі мүмкін.
«Университет оқытушысы ретінде мен бұғаттаулардың елге қандай пайда әкелетінін түсінбеймін», – деді Мұхаммад-Реза Ареф.
Иранда бірқатар танымал әлеуметтік желі мен интернет платформаларына ұзақ уақыттан бері шектеу қойылған.
2025 жылдың соңында, елдегі ауқымды наразылықтар мен АҚШ-пен қақтығысқа байланысты интернетке енгізілген жаңа шектеулерге дейін, Иран билігі Telegram, YouTube және Instagram сияқты платформаларға қолжетімділікті қалпына келтіру мәселесін қарастырып жатқаны хабарланған. Telegram Иранда 2018 жылдың сәуірінде сот шешімімен бұғатталған. Ал Facebook пен Twitter 2009 жылы президент сайлауына байланысты наразылықтар кезінде шектелді. Instagram мен WhatsApp-қа қолжетімділік 2022 жылы Махса Аминидің полиция қамауынан кейін қайтыс болуына байланысты басталған наразылықтар кезінде шектелген. Кейін WhatsApp қайта қолжетімді болды.
