فوتو: Reuters
اقش پەن يزرايل يرانعا قارسى اسكەري وپەراتسيانى قايتا باستاۋى مۇمكىن، دەپ حابارلايدى “ادىرنا” ۇلتتىق پورتالى The New York Times باسىلىمىنا سىلتەپ.
باسىلىم مالىمەتىنشە، اقش قورعانىس مينيسترلىگى وتكەن ايدا دونالد ترامپ جاريالاعان بىتىمنەن كەيىن توقتاتىلعان «Epic Rage» وپەراتسياسىن قايتا جانداندىرۋعا دايىندالىپ جاتىر. وپەراتسيا جاڭا اتاۋمەن جالعاسۋى ىقتيمال.
قاراستىرىلىپ جاتقان نۇسقالاردىڭ ءبىرى — يران اۋماعىنا امەريكالىق ارنايى جاساق جىبەرىپ، جەراستى نىساندارىندا جاسىرىلعان يادرولىق ماتەريالداردى ىزدەۋ ەكەنى تۋرالى اقپارات تاراعان.
The New York Times دەرەگىنە سايكەس، ايماقتا قازىر شامامەن 5 مىڭ تەڭىز جاياۋ اسكەرى مەن اقش ارمياسىنىڭ ەليتالىق 82-اۋە-دەسانت ديۆيزياسىنىڭ 2 مىڭ ساربازى بۇيرىق كۇتىپ وتىر.
5 مامىردا پەنتاگونداعى بريفينگتە اقش قارۋلى كۇشتەرى شتاب باستىقتارى كوميتەتىنىڭ توراعاسى گەنەرال دەن كەين 50 مىڭنان استام اسكەري قىزمەتكەر، ەكى اۋە تاسىمالداۋشى كەمە، ونداعان ەسمينەتس پەن كوپتەگەن اسكەري ۇشاق يرانعا قارسى ءىرى اسكەري ءىس-قيمىلداردى قايتا باستاۋعا دايىن ەكەنىن مالىمدەگەن.
سونداي-اق اقش يراننىڭ نەگىزگى مۇناي حابى سانالاتىن حارك ارالىن باسىپ الۋ مۇمكىندىگىن دە قاراستىرىپ وتىر. الايدا امەريكالىق شەنەۋنىكتەر بۇل وپەراتسيا ۇلكەن شىعىنعا اكەلۋى مۇمكىن ەكەنىن ايتقان.
بۇدان بولەك، ۆاشينگتون تەگەرانمەن كەلىسسوزدەر تىعىرىققا تىرەلسە، يراننىڭ اسكەري جانە ينفراقۇرىلىمدىق نىساندارىنا «نەعۇرلىم اگرەسسيۆتى اۋە سوققىلارىن» جاساۋ نۇسقاسىن تالقىلاپ جاتىر.
باسىلىمنىڭ حابارلاۋىنشا، يران ورمۇز بۇعازى ماڭىنداعى 33 زىمىران بازاسىنىڭ 30-ىن قايتا ىسكە قوسقان. بۇل نىساندار اقش اسكەري كەمەلەرى مەن مۇناي تانكەرلەرىنە قاۋىپ ءتوندىرۋى مۇمكىن.
سونىمەن قاتار يران سىرتقى ىستەر ءمينيسترى ابباس اراگچي تەگەراننىڭ رەسەيمەن بايىتىلعان ۋراندى وتكىزۋ ماسەلەسى بويىنشا الدىن الا كەلىسسوز جۇرگىزگەنىن راستادى. ونىڭ ايتۋىنشا، بۇل ماسەلە اقش-پەن يادرولىق باعدارلاما جونىندەگى كەلىسسوزدەردىڭ كەيىنگى كەزەڭىندە قارالادى.
