قاسىم-جومارت توقاەۆتىڭ جالپىۇلتتىق سايلاۋدا جەڭىسكە جەتىپ، ەل پرەزيدەنتى قىزمەتىنە كىرىسكەنىنە تۋرا ءبىر جىلدىڭ ءجۇزى تولعان. اتاۋلى كۇنگە وراي سەنات توراعاسى ماۋلەن اشىمباەۆ Facebook پاراقششاسىندا جازبا جاريالادى، دەپ حابارلايدى "ادىرنا" ءتىلشىسى.
ماۋلەن اشىمباەۆ الەۋمەتتىك جەلىدەگى پاراقشاسىندا:
اتالعان سايلاۋدا قازاقستان حالقىنىڭ باسىم كوپشىلىگى مەملەكەت باسشىسى ۇسىنعان رەفورمالار باعدارلاماسىن جانە ادىلەتتى قازاقستان قۇرۋ باعدارىن قولداپ، داۋىس بەرگەن ەدى. وسى ۋاقىت ىشىندە ەلىمىزدىڭ قوعامدىق-ساياسي ومىرىنە جانە ەكونوميكاسىنا اسەر ەتكەن ايتارلىقتاي وزگەرىستەر بولدى. بيلىكتىڭ بارلىق تارماقتارى قايتا جاڭعىرتىلدى. ساياسي جۇيەنى دەموكراتيالاندىرۋ جولىندا ماڭىزدى قادامدار جاسالدى. تەجەمەلىك پەن تەپە-تەڭدىك جۇيەسى كۇشەيە ءتۇستى. وڭىرلەردىڭ دەربەستىگى دە نىعايىپ كەلەدى. اكىمشىلىك رەفورما ىسكە اسىرىلا باستادى، - دەدى توراعا.
سونداي-اق ول سايلاۋ جۇيەسى دە جاڭارتىلعانىن توقتالدى. "ۇلتتىق قور-بالالارعا" اتتى پرەزيدەنتتىك باعدارلاما بارىسىن اتاپ، اۋداندار مەن اۋىل اكىمدەرىنىڭ سايلاۋىن ايتتى.
حالىقتىڭ ءال-اۋقاتىن جاقسارتۋ جانە ءومىر ءسۇرۋ ساپاسىن ارتتىرۋ باعىتىندا دا اۋقىمدى جۇمىس اتقارىلدى. الەۋمەتتىك ساياساتتىڭ تيىمدىلىگىن ارتتىرۋ ءۇشىن ارنايى الەۋمەتتىك كودەكس قابىلداندى. «جايلى مەكتەپ»، «اۋىلدا دەنساۋلىق ساقتاۋدى جاڭعىرتۋ»، «اۋىل اماناتى» سياقتى ۇلتتىق جوبالار جۇيەلى تۇردە ىسكە اسىرىلىپ كەلەدى. كەلەسى جىلدان باستاپ «ۇلتتىق قور – بالالارعا» پرەزيدەنتتىك باعدارلاماسى اياسىندا تولەمدەر تولەنە باستايدى.
سەنات توراعاسى پرەزيدەنت قاسىم-جومارت كەمەلۇلى توقاەۆتىڭ ساياساتىن قولداپ، مەملەكەت باسشىسىنىڭ توڭىرەگىنە توپتاسۋى اسا ماڭىزدى ەكەنىن جەتكىزدى.
«بىرلىگى بەكەم ەل بيىكتى باعىندىرادى» دەيدى. شىن مانىندە ءبىز ادىلەتتى، جاڭارعان، ينكليۋزيۆتى جانە دەموكراتيالىق قازاقستان قۇرۋ جولىندا جۇدىرىقتاي جۇمىلا بىلسەك، كوزدەگەن ماقساتتارىمىزعا قول جەتكىزەمىز»، - دەپ تۇيىندەدى ءسوزىن ماۋلەن اشىمباەۆ.
