بۇگىن بەلگىلى جازۋشى، ادەبيەتشى-عالىم، ابايتانۋشى، اۋەزوۆتانۋشى، الاشتانۋشى، فيلولوگيا عىلىمدارىنىڭ دوكتورى، پروفەسسور تۇرسىن جۇرتباي 75 جاسقا تولدى. وسىعان وراي «اتامۇرا» باسپاسىنىڭ پرەزيدەنتى راقىمعالي ابرارۇلى قۇل-مۇحاممەد عالىمدى مەرەيلى جاسىمەن قۇتتىقتاپ، ىزگى تىلەگىن جەتكىزدى.
«تۇرسىن اعامىزدىڭ ادەبيەتتەگى، عىلىمداعى ۇلكەن ەڭبەگى مەملەكەت تاراپىنان جوعارى باعالانىپ، قازاقستان رەسپۋبليكاسى پرەزيدەنتىنىڭ جارلىعىمەن ءى دارەجەلى «بارىس» وردەنىمەن ماراپاتتالدى. بۇل – اعامىزدىڭ قازاق عىلىمى مەن ادەبيەتىنە، ۇلتتىق رۋحانياتىمىزعا سىڭىرگەن ولشەۋسىز ەڭبەگىنە بەرىلگەن ۇلكەن باعا دەپ سانايمىن»، – دەپ جازدى "اتامۇرا" كورپوراتسياسىنىڭ پرەزيدەنتى راقىمعالي قۇل-مۇحاممەد جەلىدەگى پاراقشاسىندا.
ونىڭ ايتۋىنشا، تۇرسىن جۇرتبايدىڭ شىعارماشىلىق جولى قازاق ادەبيەتى مەن عىلىمىنىڭ ماڭىزدى باعىتتارىمەن تىعىز بايلانىستى. عالىمنىڭ ءار جىلدارى جارىق كورگەن، اباي مەن قۇنانبايدىڭ تاعىلىمدى عۇمىرىن، الاش قايراتكەرلەرىنىڭ كۇردەلى تاعدىرىن، ۇلت تاريحىنىڭ تەرەڭ سىرلارىن عىلىمي تۇرعىدان زەردەلەيتىن ىرگەلى ەڭبەكتەرى «اتامۇرا» باسپاسىنان جيىرمادان استام كىتاپ بولىپ جارىق كورگەن.
«باسپادان شىققان ەڭبەكتەرىنىڭ ءبىرازىن ءوز قولىمنان وتكىزىپ، تەرەڭ تانىسىپ شىقتىم دەسەم، ارتىق ايتقاندىق بولماس. سول قازىنالى دۇنيەلەردىڭ ىشىندە جاقىندا مەملەكەتتىك سىيلىققا ۇسىنىلعان «تولىق ادام» اتتى ەكى تومدىق زەرتتەۋىنىڭ ورنى بولەك»، – دەپ جازدى باسپا باسشىسى.
راقىمعالي قۇل-مۇحاممەدتىڭ پىكىرىنشە، «تولىق ادام» – تۇرسىن جۇرتبايدىڭ ابايدىڭ شىعارماشىلىق عۇمىرىنا، كوركەم الەمىنە، ويلاۋ جۇيەسى مەن ىشكى پسيحولوگياسىنا قاتىستى ۇزاق جىلدار بويعى ىزدەنىستەرىنىڭ عىلىمي تۇجىرىمى.
«بۇل ەكى تومدىق كولەمدى زەرتتەۋ ادەبي-سالىستىرمالى تالداۋدىڭ تىڭ ۇلگىسىن ۇسىنىپ، ابايتانۋ عىلىمىندا بۇرىن ارنايى نازارعا الىنباعان ادىستەمەلىك باعىتتاردى زەردەلەۋىمەن قۇندى. ەڭبەكتە ابايدىڭ تانىم-تۇسىنىكتەرىنە قاتىستى جاڭا دەرەكتەر مەن دايەكتەر دە مولىنان قامتىلعان. سوندىقتان «تولىق ادام» – ابايتانۋشىلار مەن قوعامتانۋ عىلىمىنىڭ ماماندارىنا عانا ەمەس، اباي الەمىن تەرەڭىرەك تانىعىسى كەلەتىن قالىڭ وقىرمانعا دا اسا قاجەت تاعىلىمدى ەڭبەك»، – دەدى ول.
راقىمعالي قۇل-مۇحاممەد تۇرسىن جۇرتبايمەن اۋلەتى اراسىنداعى ەجەلدەن كەلە جاتقان سىيلاستىققا دا توقتالدى.
«تۇرسىن اعامىز ءبىز ءۇشىن ورنى ەرەكشە جان. اعامىز ءبىزدىڭ قۇل-مۇحاممەد اۋلەتىمەن ەرتەدەن ەتەنە ارالاسىپ، اعايىن-باۋىرداي جاقىن بولىپ كەتكەن قادىرلى ادام. ءبىز دە اعامىزدىڭ شىعارماشىلىعىن ۇنەمى نازاردا ۇستاپ، ەڭبەكتەرىن قۇرمەتپەن وقىپ، قولداۋ كورسەتىپ كەلەمىز»، – دەدى «اتامۇرا» كورپوراتسياسىنىڭ پرەزيدەنتى.
سونداي-اق ول عالىمدى 75 جىلدىق مەرەيتويىمەن قۇتتىقتاپ، دەنىنە ساۋلىق، وتباسىنا اماندىق، شاڭىراعىنا باق-بەرەكە جانە شىعارماشىلىعىنا مول شابىت تىلەدى.
«قازاقستاننىڭ عىلىمى مەن رۋحانياتىنا سىڭىرگەن ەڭبەگىڭىز جانا بەرسىن! جاقىندا عانا يەلەنگەن ءى دارەجەلى «بارىس» وردەنىڭىز قۇتتى بولسىن! ۇلت تاريحى مەن رۋحانياتىنىڭ قازىناسىن تۇگەندەگەن ەڭبەكتەرىڭىز ەل يگىلىگىنە جاراپ، ۇزاق جىل قىزمەت ەتە بەرسىن. مەرەيىڭىز ۇستەم، ابىرويىڭىز اسقاق، بەدەلىڭىز بيىكتەي بەرسىن!» – دەپ اقجولتاي تىلەگىن ءبىلدىردى راقىمعالي قۇل-مۇحاممەد.
كەزدەسۋ سوڭىندا ابايتانۋشى، عالىم تۇرسىن جۇرتبايدى ۇلتتىق عىلىم اكادەمياسىنىڭ اكادەميگى مۇحتار قۇل-مۇحاممەد تەلەفون ارقىلى قۇتتىقتاپ، ىزگى تىلەگىن جولدادى.
