فوتو: id-east
Halyk Bank پەن Ailat ستارتاپ-كومپانياسى قازاقستاندا يسلامدىق قارجى قىزمەتتەرىن دامىتۋ ماقساتىندا سەرىكتەستىك تۋرالى مەموراندۋمعا قول قويدى. وسى كەلىسىمنىڭ ارقاسىندا بۇعان دەيىن يسلامدىق دەپوزيتتەرمەن عانا شەكتەلىپ كەلگەن قازاقستاندىقتار قارجىسىن كوبەيتۋدىڭ تاعى ءبىر قۇرالىنا يە بولادى.
Halyk SuperApp قوسىمشاسىنداعى Halyk Invest سەرۆيسىندە حالال اكتسيالارعا ارنالعان جاڭا ءبولىم پايدا بولدى. قازىر ول پيلوتتىق رەجيمدە جۇمىس ىستەپ تۇر. قولجەتىمدى باعالى قاعازداردىڭ شاريعات تالاپتارىنا سايكەستىگى تۇراقتى تۇردە تەكسەرىلىپ وتىرادى. ال ينۆەستورلار اكتسيالاردى وزدەرىنىڭ ينۆەستيتسيالىق ماقساتتارى مەن تاۋەكەلگە دەگەن كوزقاراسىنا قاراي تاڭداي الادى.
Halyk بروكەرلىك باسقارماسىنىڭ باسشىسى نازار ەردوسوۆتىڭ ايتۋىنشا، كومپانيا قولدانۋشىلاردىڭ ءارتۇرلى توپتارىنىڭ قاجەتتىلىكتەرىن ەسكەرە وتىرىپ، Halyk Invest سەرۆيسىن دامىتۋدى جالعاستىرىپ كەلەدى.
«Ailat كومپانياسىنىڭ سكرينينگ جۇيەسىن پايدالانا وتىرىپ، يسلام تالاپتارىنا سايكەس ىرىكتەلگەن اكتسيالاردىڭ ارنايى ءتىزىمىن ىسكە قوسىپ وتىرمىز. بۇل ءاربىر كليەنت ءۇشىن ينۆەستيتسيالىق مۇمكىندىكتەردى قولجەتىمدى ەتۋ جولىنداعى تاعى ءبىر ماڭىزدى قادام»، – دەدى نازار ەردوسوۆ.
Ailat كومپانياسىنىڭ نەگىزىن قالاۋشى ازات وتەپباي Halyk-پەن ىنتىماقتاستىق قازاقستاندا ەتيكالىق، سونىڭ ىشىندە يسلامدىق ينۆەستيتسيالاردى قولجەتىمدى ەتۋ باعىتىنداعى ماڭىزدى قادام ەكەنىن اتاپ ءوتتى.
ونىڭ ايتۋىنشا، ەلدەگى ەڭ ءىرى بانكتىڭ ميلليونداعان كليەنتكە باعالى قاعازداردى شاريعات تالاپتارىنا سايكەستىگى تۇرعىسىنان تەكسەرۋ جانە سانالى ينۆەستيتسيالاۋ مۇمكىندىگىن ۇسىنۋى ماڭىزدى. قازىرگى ينۆەستورلار ءوز قاراجاتىن قايدا سالىپ جاتقانىن جانە بۇل ينۆەستيتسيالاردىڭ ءوز ۇستانىمدارىنا سايكەس كەلەتىنىن بىلگىسى كەلەدى.
Ailat بۇل قاجەتتىلىكتى جاساندى ينتەللەكت نەگىزىندەگى سكرينينگ، ساراپتامالىق ادىستەمە جانە دەرەكتەر ساپاسىن تۇراقتى باقىلاۋ ارقىلى قامتاماسىز ەتەدى.
حالال اكتسيالار دەگەنىمىز نە؟
حالال اكتسيالار – قىزمەتى مەن قارجىلىق كورسەتكىشتەرى يسلام تالاپتارىنا سايكەس كەلەتىن كومپانيالاردىڭ اكتسيالارى.
مۇنداي باعالى قاعازداردى ىرىكتەۋ كەزىندە كومپانيا قىزمەتىنىڭ باعىتى، سونداي-اق ونىڭ قارىز دەڭگەيى مەن پايىزدىق كىرىستەرىنىڭ رۇقسات ەتىلگەن شەگى ەسكەرىلەدى.
اكتسيالار قالاي ىرىكتەلەدى؟
ينۆەستورلارعا كومپانيالاردىڭ شاريعات تالاپتارىنا سايكەستىگىن وزدەرى تالداۋدىڭ قاجەتى جوق. Ailat كومپانيالاردىڭ اۋديتتەن وتكەن قارجىلىق ەسەپتىلىگى جاريالانعاننان كەيىن توقسانىنا ءبىر رەت تەكسەرۋ جۇرگىزەدى.
تەكسەرۋ ناتيجەسىنە قاراي بەلگىلەنگەن تالاپتارعا سايكەس كەلەتىن اكتسيالار ءتىزىمى جاڭارتىلىپ وتىرادى.
سكرينينگ ادىستەمەسى يسلام قارجى ينستيتۋتتارىنا ارنالعان بۋحگالتەرلىك ەسەپ جانە اۋديت ۇيىمىنىڭ (AAOIFI) حالىقارالىق ستاندارتتارىنا نەگىزدەلگەن.
اۆتوماتتى تۇردە مىنا سالالارمەن بايلانىستى كومپانيالار تىزىمنەن شىعارىلادى:
- ءداستۇرلى بانك قىزمەتى;
- ساقتاندىرۋ;
- الكوگول ءوندىرىسى;
- شوشقا ونىمدەرى;
- قۇمار ويىندار;
- پورنوگرافيا;
- مۋزىكا يندۋسترياسى;
- قوناقۇي بيزنەسى;
- كينويندۋستريا;
- ادامدى كلونداۋ.
«تازا ەمەس» تابىسقا نە بولادى؟
Halyk Invest تۇسىندىرگەندەي، قىزمەتىنىڭ بىرنەشە باعىتى بار كومپانيالارعا دا ينۆەستيتسيا سالۋعا بولادى. بىراق شاريعاتتا تىيىم سالىنعان قىزمەت تۇرلەرىنەن تۇسەتىن تابىس كومپانيانىڭ جالپى كىرىسىنىڭ 5 پايىزىنان اسپاۋى ءتيىس.
ەگەر كومپانيانىڭ مۇنداي قىزمەتتەن تۇسەتىن تابىسى 5 پايىزدان اسپاسا، ديۆيدەندتەردىڭ سوعان سايكەس بولىگى «تازا ەمەس» تابىس بولىپ ەسەپتەلەدى. بۇل سوما قايىرىمدىلىققا باعىتتالادى. وسى ارقىلى ينۆەستوردىڭ تابىسى يسلامدىق قارجى قاعيدالارىنا سايكەس «تازارتىلادى».
