اۋعانستاننىڭ باس بارلاۋ باسقارماسىنىڭ قىزمەتكەرلەرى گەرات قالاسىندا بۇۇ ميسسياسىنىڭ ەكى قىزمەتكەرىن ۇستادى. بۇل تۋرالى Afghanistan International باسىلىمى جازدى، دەپ حابارلايدى «ادىرنا» ءتىلشىسى.
قىزمەتكەرلەر پروۆينتسياداعى ايەلدەردىڭ ۇستالۋىنا قاتىستى بايانداما دايىنداعاننان كەيىن قاماۋعا الىنعان. وڭىردە ايەلدەرگە ارنالعان جاڭا تالاپتارعا، سونىڭ ىشىندە كوسمەتيكا قولدانۋعا تىيىم سالۋعا بايلانىستى نارازىلىقتار ورشىگەن.
تاليباننىڭ بارلاۋ قىزمەتى ميسسيا قىزمەتكەرلەرىن 9 تامىز كۇنى كەشكە ۇستاعان. ولار بۇعان دەيىن زارداپ شەككەن بىرنەشە قىزبەن سۇحباتتاسىپ ۇلگەرگەن.
ميسسيا وكىلدەرى قىزمەتكەرلەرگە قانداي ايىپ تاعىلعانى تۋرالى حابارلانباعانىن جانە ولارمەن كەزدەسۋگە مۇمكىندىك بەرىلمەگەنىن مالىمدەدى. ايتۋلارىنشا، ۇستالعاندار قازىرگى ۋاقىتتا بايلانىسقا شىقپاي وتىر.
دۇيسەنبى كۇنى اۋعانستاننىڭ ادىلەت ءمينيسترى ابدۋل حاكيم شاراي حالىقارالىق ۇيىمداردىڭ قىزمەتكەرلەرىنە ادامداردىڭ كەلىسىمىنسىز ولاردى سۋرەتكە تۇسىرۋگە رۇقسات ەتىلمەيتىنىن ايتقان ەدى. ول مۇنداي وقيعالار نازاردان تىس قالمايتىنىن اتاپ وتكەن.
