رەسەي بيلىگى ەل وڭىرلەرىنە 2026 جىلدىڭ سوڭىنا دەيىن اسكەرگە 409 مىڭ ادامدى كەلىسىمشارت بويىنشا تارتۋ تۋرالى جوسپار قويعان، دەپ حابارلايدى "ادىرنا" ۇلتتىق پورتالى Financial Times-قا سىلتەپ.
باسىلىمنىڭ مالىمەتىنشە، اتالعان شارا رەسەيدە جاڭا موبيليزاتسيا جاريالاۋ قاجەتتىلىگىن بولدىرماۋعا باعىتتالعان. كرەمل مەن رەسەي قورعانىس مينيسترلىگى ايماق باسشىلارىنا اسكەري قىزمەتكە قابىلداۋ كورسەتكىشتەرىن قامتاماسىز ەتۋ مىندەتىن جۇكتەگەن.
Financial Times دەرەگىنشە، جاڭا كەلىسىمشارت بويىنشا اسكەري قىزمەتكە الىنعانداردىڭ باسىم بولىگى رەزەرۆ قالىپتاستىرۋ ءۇشىن ەمەس، ۋكرايناداعى سوعىس ايماعىنداعى ادام شىعىنىن تولىقتىرۋ ءۇشىن جىبەرىلەدى. باسىلىم باعالاۋىنشا، رەسەي اسكەرىنىڭ شىعىنى ايىنا 30 مىڭ ادامنان اسۋى مۇمكىن ەكەنىن جازدى. سوعان قاراماستان رەسەي اسكەرى شابۋىل قارقىنىن ايتارلىقتاي ارتتىرا الماعان.
Financial Times مالىمەتىنشە، رەسەي ايماقتارىندا كەلىسىمشارت بويىنشا اسكەري قىزمەتكە ادام تارتۋ ءۇشىن ءتۇرلى تاسىلدەر قولدانىلىپ جاتىر. ولاردىڭ قاتارىندا ەر ادامداردى كوشەدە ۇستاۋ، جۇمىس ورىندارىنا تەكسەرۋ جۇرگىزۋ، شەنەۋنىكتەردىڭ ازاماتتارعا بارۋى جانە بەرەشەگى بار ادامداردى اسكەرگە تارتۋ ارەكەتتەرى بار. بۇعان قوسا شارتتى تۇردە سوتتالعاندار مەن جاقىندا مەرزىمدى اسكەري قىزمەتىن اياقتاعان ازاماتتاردى كەلىسىمشارتقا قول قويۋعا ۇگىتتەۋ جۇمىستارى جۇرگىزىلەتىنى ايتىلعان.
باسىلىم پەنزا قالاسىندا پوليتسيا قىزمەتكەرلەرى جۇمىس ورىندارى مەن كوشەلەردە رەيد جۇرگىزىپ، ازاماتتاردى اسكەري كوميسسارياتتارعا جەتكىزگەن جاعدايلاردى كەلتىردى. ۇقساس شارالار رەسەيدىڭ باسقا وڭىرلەرىندە دە بولعانى حابارلاندى.
