تۇركىستاندا وتكەن ورتالىق ازيا مەملەكەتارالىق سۋ شارۋاشىلىعىن ۇيلەستىرۋ كوميسسياسىنىڭ 94-وتىرىسىندا سىرداريا وزەنى باسسەينىندە سۋ رەسۋرستارىن اۆتوماتتاندىرىلعان ەسەپكە الۋ جۇيەسىن ەنگىزۋ جوسپارىنىڭ جوباسىن ازىرلەۋ تۋرالى شەشىم قابىلداندى، دەپ حابارلايدى "ادىرنا" ءتىلشىسى.
جيىنعا قازاقستان، تاجىكستان، تۇرىكمەنستان جانە وزبەكستاننىڭ سۋ شارۋاشىلىعى سالاسىنا جاۋاپتى ۆەدومستۆولارىنىڭ باسشىلارى قاتىستى. وتىرىس بارىسىندا تاراپتار 2026 جىلدىڭ ۆەگەتاتسيالىق كەزەڭگە ارنالعان سىرداريا جانە ءامۋداريا وزەندەرى باسسەيندەرىندەگى سۋ پايدالانۋ ليميتتەرى مەن سۋ قويمالارىنىڭ جۇمىس رەجيمىن قاراستىردى.
قابىلدانعان شەشىمگە سايكەس، قىركۇيەك ايىنا دەيىن سىرداريا باسسەينىندە سۋ ەسەبىن اۆتوماتتاندىرۋ جوسپارىن ازىرلەيتىن ارنايى جۇمىس توبى قۇرىلادى. سونىمەن قاتار قاتىسۋشىلار دۇنيەجۇزىلىك بانكپەن بىرلەسىپ جۇزەگە اسىرىلىپ جاتقان CAWEC گرانتتىق جوباسىنىڭ ىسكە اسىرىلۋ بارىسىن تالقىلادى. اتالعان جوبا ورتالىق ازياداعى سۋ رەسۋرستارىن ءتيىمدى پايدالانۋدى ارتتىرۋعا باعىتتالعان. سونداي-اق ارالدى قۇتقارۋ حالىقارالىق قورى اياسىنداعى مىندەتتەردىڭ ورىندالۋ ماسەلەسى قارالدى.
قازاقستاننىڭ سۋ رەسۋرستارى جانە يرريگاتسيا مينيسترلىگىنىڭ مالىمەتىنشە، 2026 جىلعى 1 ساۋىردەن بەرى شاردارا سۋ قويماسىنا شامامەن 3 ميلليارد تەكشە مەتر سۋ تۇسكەن. بۇل وتكەن جىلدىڭ سايكەس كەزەڭىمەن جانە كوپجىلدىق ورتاشا كورسەتكىشپەن سالىستىرعاندا جوعارى. قازىر سىرداريا باسسەينىندەگى سۋ شارۋاشىلىعى جاعدايى قولايلى دەپ باعالانىپ وتىر. اۋىل شارۋاشىلىعى قاجەتتىلىكتەرى ءۇشىن سۋ بەرۋ جوسپارلى رەجيمدە جۇرگىزىلۋدە.
