اقش پرەزيدەنتى دونالد ترامپ دجو بايدەن اكىمشىلىگىن ۋكرايناعا اسكەري كومەك كورسەتۋ بارىسىندا امەريكالىق وق-ءدارى قورىن ازايتتى دەپ ايىپتادى، دەپ حابارلايدى "ادىرنا" ۇلتتىق پورتالى.
ونىڭ ايتۋىنشا، قازىرگى اكىمشىلىك اقش ارسەنالدارىن قايتا تولىقتىرۋعا كىرىسكەن.
ترامپ 6 تامىزدا اق ۇيدە وتكەن بريفينگ بارىسىندا بايدەن اكىمشىلىگى ۋكرايناعا شامامەن 300 ميلليارد دوللار كولەمىندە وق-ءدارى بەرگەنىن ايتتى.
«مەن قىزمەتتەن كەتكەن كەزدە ءبارى تولىق بولاتىن. ال ول ولاردىڭ ەداۋىر بولىگىن بەرىپ جىبەردى. قازىر ءبىز قورلاردى قايتا قالپىنا كەلتىرىپ جاتىرمىز»، – دەدى اقش پرەزيدەنتى.
جۋرناليستەر ترامپتان ۆاشينگتوننىڭ ۋكرايناعا Patriot اۋە شابۋىلىنا قارسى قورعانىس جۇيەسىنە ارنالعان قوسىمشا زىمىراندار مەن الىس قاشىقتىقتاعى زىمىرانداردى بەرۋدى جوسپارلاپ وتىرعانىن سۇرادى.
بۇعان ترامپ: «بىزگە دە زىمىراندار قاجەت»، – دەپ جاۋاپ بەردى.
سونىمەن بىرگە اقش پرەزيدەنتى امەريكالىق قارۋلى كۇشتەردىڭ قازىرگى جاعدايى جاقسى ەكەنىن اتاپ ءوتتى. ونىڭ سوزىنشە، اقش ارمياسىندا قارۋ-جاراق جەتكىلىكتى، ال كەيبىر قارۋ تۇرلەرى زاماناۋي بولماسا دا، تيىمدىلىگىن ساقتاپ وتىر.
بۇعان دەيىن ۋكراينا پرەزيدەنتى ۆلاديمير زەلەنسكي ەلگە اۋە شابۋىلىنا قارسى قورعانىس جۇيەلەرىنە ارنالعان زىمىراندار اسا قاجەت ەكەنىن حابارلادى.
زەلەنسكيدىڭ ايتۋىنشا، 1 تامىزعا قاراعان ءتۇنى رەسەي ۋكرايناعا 35 زىمىران ۇشىرعان. ولاردىڭ 27-ءسى بالليستيكالىق زىمىران بولعان. ۋكراينانىڭ اۋە قورعانىس كۇشتەرى ولاردىڭ بىرەۋىن عانا اتىپ تۇسىرگەن.
ۋكراينا باسشىسى حالىقارالىق سەرىكتەستەردى قاجەتتى زىمىرانداردى جەدەل تۇردە جەتكىزۋگە شاقىردى. ونىڭ پىكىرىنشە، بۇل قارۋ ىقتيمال ستسەناريلەر ءۇشىن قويمادا ساقتالماي، رەسەيدىڭ شابۋىلىن تەجەۋ ءۇشىن ءدال قازىر قولدانىلۋى قاجەت.
