الماتى وبلىسىندا مارقۇم بولات نازارباەۆتىڭ بالالارىنا قاتىستى جەر تەلىمىنە بايلانىستى سوت ءىسى باستالدى، دەپ حابارلايدى "ادىرنا" ءتىلشىسى.
قاراساي اۋدانىنىڭ پروكۋراتۋراسى جەر ۋچاسكەسىن ساتىپ الۋ-ساتۋ جانە قابىلداۋ-تاپسىرۋ تۋرالى كەلىسىمدەردى جارامسىز دەپ تانۋدى سۇراپ، سوتقا تالاپ ارىز بەرگەن.
سوت قۇجاتتارىنا سايكەس، تالاپكەر – قاراساي اۋدانىنىڭ پروكۋرورى. جاۋاپكەرلەر قاتارىندا قاراساي اۋدانىنىڭ اكىمى، اۋداندىق جەر قاتىناستارى ءبولىمى، سونداي-اق ءۇش كومپانيا بار. ولاردىڭ ءبىرى – Kurylys LTD. اتالعان كومپانيا بۇعان دەيىن بولات نازارباەۆقا تيەسىلى بولعان «التىن وردا» بازارىنا قاتىستى سوت داۋلارىندا دا اتالعان.
ءىس بويىنشا جاۋاپكەرلەر قاتارىندا بولات نازارباەۆتىڭ جۇبايى، ونىڭ ۇلى نۇربول جانە تاعى 13 بالاسى بار. كامەلەتكە تولماعان بالالاردىڭ سوتتاعى مۇددەسىن ولاردىڭ زاڭدى وكىلدەرى قورعايدى.
پروكۋراتۋرا سوتتان جەر ۋچاسكەسىنە قاتىستى ساتىپ الۋ-ساتۋ شارتتارى مەن قابىلداۋ-تاپسىرۋ اكتىسىن جارامسىز دەپ تانۋدى تالاپ ەتىپ وتىر. الايدا قازىرگى تاڭدا سوت ماتەريالدارىندا جەردىڭ بالالاردىڭ اتىنا قانداي جولمەن وتكەنى جانە مامىلەنىڭ ناقتى قانداي نەگىزدە جارامسىز دەپ تانىلۋى سۇرالعانى كورسەتىلمەگەن.
سوت تالاپ ارىزدى وندىرىسكە قابىلداپ، ازاماتتىق ءىس قوزعاعان. قازىرگى ۋاقىتتا تاراپتار ءىس ماتەريالدارىمەن تانىسىپ، ءوز دالەلدەرى مەن تۇسىنىكتەمەلەرىن ۇسىنۋعا قۇقىلى. سونىمەن قاتار تاراپتارعا داۋدى سوتقا دەيىن نەمەسە سوت بارىسىندا بىتىمگەرشىلىك ارقىلى رەتتەۋ مۇمكىندىگى بەرىلگەن.
ءىس بويىنشا العاشقى سوت وتىرىسى تامىز ايىنىڭ سوڭىنا بەلگىلەنگەن. الدىن الا اڭگىمەلەسۋدەن كەيىن سوت ءىستى قاراۋدىڭ ودان ارعى ءتارتىبىن انىقتايدى.
بۇل – بولات نازارباەۆتىڭ بالالارىنا قاتىستى العاشقى سوت داۋى ەمەس. بۇعان دەيىن ولاردىڭ اتى بىرنەشە ازاماتتىق ءىس بويىنشا جاۋاپكەر رەتىندە اتالعان.
سونىمەن قاتار نۇربول نازارباەۆتىڭ ميللياردتاعان تەڭگە كولەمىندەگى قارىزىنا بايلانىستى بانكروتتىق ءراسىمىن باستاۋعا بىرنەشە رەت ارەكەت جاساعانى بەلگىلى. اشىق سوت ماتەريالدارىنا سايكەس، ونىڭ مەملەكەت الدىنداعى قارىزى 63,7 ميلليارد تەڭگەگە جەتەدى. ونىڭ نەگىزگى بولىگى – مەملەكەتكە قايتارىلۋى ءتيىس اكتيۆتەر مەن سوت شىعىندارى.
قازىر الماتى وبلىسىنداعى جاڭا جەر داۋىنا قاتىستى سوت پروتسەسى جالعاسىپ جاتىر. سوتتىڭ تۇپكىلىكتى شەشىمى ازىرگە شىققان جوق.
