باس پروكۋراتۋرا بولات نازارباەۆتىڭ ۇلى نۇربول نازارباەۆقا قاتىستى قوزعالعان قىلمىستىق ءىستى توقتاتۋ تۋرالى شەشىمنىڭ كۇشىن جويدى، دەپ حابارلايدى "ادىرنا" ۇلتتىق پورتالى.
بۇل تۋرالى باس پروكۋرور بەرىك اسىلوۆ دەپۋتاتتىق ساۋالعا بەرگەن جاۋابىندا ايتتى.
ۆەدومستۆونىڭ مالىمەتىنشە، ءىستىڭ ماتەريالدارى قوسىمشا تەكسەرۋگە جىبەرىلگەن.
“سوتقا دەيىنگى تەرگەۋ ماتەريالدارىن زەردەلەۋ جانە قۋات ەرمەنتاەۆ ۇسىنعان دالەلدەردى ەسكەرە وتىرىپ، 2025 جىلعى 9 قازاندا بۇرىن قابىلدانعان شەشىمنىڭ كۇشى جويىلدى. قازىرگى ۋاقىتتا الماتى قالاسى بويىنشا ەكونوميكالىق تەرگەۋ دەپارتامەنتى ايتىلعان فاكتىلەردى جان-جاقتى جانە وبەكتيۆتى تەكسەرۋگە باعىتتالعان قوسىمشا تەرگەۋ ارەكەتتەرىن جۇرگىزىپ جاتىر”، – دەدى بەرىك اسىلوۆ.
بۇل ءىس Porus كومپانياسىنداعى 16 پايىزدىق ۇلەستى زاڭسىز قايتا تىركەۋ فاكتىسىنە قاتىستى قوزعالعان. كومپانيا ۇلەسى كاسىپكەر قۋات ەرمەنتاەۆقا تيەسىلى بولعان.
بۇعان دەيىن اتالعان ءىس “رەيدەرلىك” بابىمەن تەرگەلىپ، 2024 جىلعى 22 اقپاندا قىلمىس قۇرامىنىڭ بولماۋىنا بايلانىستى توقتاتىلعان ەدى. الايدا ەرمەنتاەۆ جاڭا دالەلدەر ۇسىنعاننان كەيىن باس پروكۋراتۋرا ءىستى قايتا قاراۋعا جىبەردى.
بانكروتقا ۇشىرادى دەپ جاريالانعان نازارباەۆ ءىسىنىڭ بۇلىڭعىرلىعىنا بايلانىستى بۇدان الدىن دەپۋتات ەرمۇرات باپي دابىل قاققان.
