Almaty oblysynda marqūm Bolat Nazarbaevtyŋ balalaryna qatysty jer telımıne bailanysty sot ısı bastaldy, dep habarlaidy "Adyrna" tılşısı.
Qarasai audanynyŋ prokuraturasy jer uchaskesın satyp alu-satu jäne qabyldau-tapsyru turaly kelısımderdı jaramsyz dep tanudy sūrap, sotqa talap aryz bergen.
Sot qūjattaryna säikes, talapker – Qarasai audanynyŋ prokurory. Jauapkerler qatarynda Qarasai audanynyŋ äkımı, audandyq jer qatynastary bölımı, sondai-aq üş kompaniia bar. Olardyŋ bırı – Kurylys LTD. Atalǧan kompaniia būǧan deiın Bolat Nazarbaevqa tiesılı bolǧan «Altyn Orda» bazaryna qatysty sot daularynda da atalǧan.
Is boiynşa jauapkerler qatarynda Bolat Nazarbaevtyŋ jūbaiy, onyŋ ūly Nūrbol jäne taǧy 13 balasy bar. Kämeletke tolmaǧan balalardyŋ sottaǧy müddesın olardyŋ zaŋdy ökılderı qorǧaidy.
Prokuratura sottan jer uchaskesıne qatysty satyp alu-satu şarttary men qabyldau-tapsyru aktısın jaramsyz dep tanudy talap etıp otyr. Alaida qazırgı taŋda sot materialdarynda jerdıŋ balalardyŋ atyna qandai jolmen ötkenı jäne mämılenıŋ naqty qandai negızde jaramsyz dep tanyluy sūralǧany körsetılmegen.
Sot talap aryzdy öndırıske qabyldap, azamattyq ıs qozǧaǧan. Qazırgı uaqytta taraptar ıs materialdarymen tanysyp, öz dälelderı men tüsınıktemelerın ūsynuǧa qūqyly. Sonymen qatar taraptarǧa daudy sotqa deiın nemese sot barysynda bıtımgerşılık arqyly retteu mümkındıgı berılgen.
Is boiynşa alǧaşqy sot otyrysy tamyz aiynyŋ soŋyna belgılengen. Aldyn ala äŋgımelesuden keiın sot ıstı qaraudyŋ odan arǧy tärtıbın anyqtaidy.
Būl – Bolat Nazarbaevtyŋ balalaryna qatysty alǧaşqy sot dauy emes. Būǧan deiın olardyŋ aty bırneşe azamattyq ıs boiynşa jauapker retınde atalǧan.
Sonymen qatar Nūrbol Nazarbaevtyŋ milliardtaǧan teŋge kölemındegı qaryzyna bailanysty bankrottyq räsımın bastauǧa bırneşe ret äreket jasaǧany belgılı. Aşyq sot materialdaryna säikes, onyŋ memleket aldyndaǧy qaryzy 63,7 milliard teŋgege jetedı. Onyŋ negızgı bölıgı – memleketke qaitaryluy tiıs aktivter men sot şyǧyndary.
Qazır Almaty oblysyndaǧy jaŋa jer dauyna qatysty sot prosesı jalǧasyp jatyr. Sottyŋ tüpkılıktı şeşımı äzırge şyqqan joq.
