استانادا قۇرىلتاي سايلاۋىنا قاتىساتىن جەتى ساياسي پارتيا وكىلدەرىنىڭ قاتىسۋىمەن تەلەۆيزيالىق سايلاۋالدى دەبات ءوتتى، دەپ حابارلايدى "ادىرنا" ءتىلشىسى.
ءبىلىم بەرۋ جۇيەسىن دامىتۋ تاقىرىبىنا ارنالعان پىكىرتالاس جەتىنشى ارنانىڭ تىكەلەي ەفيرىندە كورسەتىلدى.
دەباتقا «ادىلەت»، جسدپ، «بايتاق»، قازاقستان حالىق پارتياسى، «اۋىل»، «اق جول» جانە Respublica پارتيالارىنىڭ وكىلدەرى قاتىستى. قاتىسۋشىلار ءبىلىم بەرۋ سالاسىن دامىتۋعا قاتىستى سايلاۋالدى باعدارلامالارىنداعى باسىم باعىتتاردى تانىستىرىپ، وزەكتى ماسەلەلەر بويىنشا پىكىر الماستى.
پىكىرتالاس ءتورت كەزەڭنەن تۇردى. پارتيا وكىلدەرى باعدارلامالارىن تانىستىرىپ، ءبىر-بىرىنە سۇراق قويدى، كورەرمەندەردىڭ ساۋالدارىنا جاۋاپ بەرىپ، سايلاۋشىلارعا قورىتىندى ۇندەۋ جاسادى. تالقىلاۋ بارىسىندا ءبىلىم بەرۋ جۇيەسىن تسيفرلاندىرۋ، جوعارى ءبىلىمنىڭ قولجەتىمدىلىگى، جۇمىسشى كادرلاردى دايارلاۋ، پەداگوگتەردىڭ مارتەبەسىن ارتتىرۋ، اۋىل جاستارىن قولداۋ جانە قازاقستاندىق جوعارى وقۋ ورىندارىنىڭ حالىقارالىق باسەكەگە قابىلەتتىلىگىن كۇشەيتۋ ماسەلەلەرى ءسوز بولدى.
ەفير بارىسىندا كورەرمەندەر QR-كود ارقىلى ۇيىمداستىرىلعان ونلاين داۋىس بەرۋگە قاتىستى. داۋىس بەرۋ قورىتىندىسى بويىنشا «ادىلەت» پارتياسى – 45,48%، «اۋىل» پارتياسى – 15,58%، Respublica پارتياسى – 12,01%، جسدپ – 9,71%، «اق جول» پارتياسى – 7,98%، قازاقستان حالىق پارتياسى – 6,96%، «بايتاق» پارتياسى – 1,58% داۋىس جينادى. ال «ەشقايسىسىن قولدامايمىن» نۇسقاسىن قاتىسۋشىلاردىڭ 0,70%-ى تاڭداعان.
تەلەدەبات قازاقستان رەسپۋبليكاسىنىڭ سايلاۋ تۋرالى زاڭناماسىنىڭ تالاپتارىنا سايكەس ۇيىمداستىرىلىپ، ساياسي پارتيالار، ساراپشىلار مەن سايلاۋشىلار اراسىنداعى اشىق ديالوگ الاڭىنا اينالدى.
