قازاقستان جىل سوڭىندا ءوز زىمىرانىن عارىشقا ۇشىرماق. قازىر ول ءۇشىن قارجى ءبولىنىپ، ايلاق دايىندالىپ جاتىر. بۇل تۋرالى قازاقستان رەسپۋبليكاسى پارلامەنتى سەناتىنىڭ دەپۋتاتى عالياسقار سارىباەۆ مالىمدەدى، دەپ حابارلايدى “ادىرنا” ۇلتتىق پورتالى.
«قازىر ءبىز ءوزىمىزدىڭ زىمىران ۇشىراتىن ايلاعىمىزدى دايىنداپ جاتىرمىز. وعان قارجى بولىنگەن. ۇكىمەت بۇل ۇسىنىستى قولدادى. بۇل – كوممەرتسيالىق باعدارلاما. سول ارقىلى ۇشىراتىن بولساق، بولاشاقتا ءبىزدىڭ زىمىرانىمىزدى پايدالانامىن دەگەن مەملەكەتتەر كوبەيەدى. قازىرگى تاڭدا افريكا ەلدەرى مەن موڭعوليا قىزىعۋشىلىق تانىتىپ وتىر. مەملەكەت باسشىسى ءاربىر مەملەكەتكە بارعاندا، عارىش سالاسىن ايتىپ جۇرەدى. فرانتسياعا ساپارىندا دا عارىش تۋرالى سويلەستى. ال موڭعوليا اپپاراتتارىن كەڭىستىككە الىپ شىعۋعا تاپسىرىس بەرىپ، كەلىسىمشارتقا قول قويىلدى. ياعني، ءبىز جىل سوڭىنا دەيىن ءوزىمىزدىڭ وتاندىق زىمىران تاسىعىشىمىزدى شىعارامىز جانە قازاقستان عارىش سالاسىندا ءوزىنىڭ جاڭا تاريحىن جازادى دەپ ويلايمىن»، - دەيدى دەپۋتات.
حالىق قالاۋلىسى الداعى 5-10 جىلدا ءتورتىنشى قازاق عارىشكەرى عارىشقا ساپار شەگۋى مۇمكىن ەكەنىن ايتتى.
«ءبىزدىڭ عارىشكەر تەك تۋريست رەتىندە بارىپ كەلمەۋى كەرەك. تۋريست رەتىندە عارىشكەردى 6 ايدا-اق دايىنداپ شىعۋعا بولادى. ءبىز حالقىمىزعا كەرەكتى عىلىمي زەرتتەۋ جۇرگىزەتىن ازاماتتاردى بۇگىننەن باستاپ دايىنداۋىمىز كەرەك. سەبەبى، ءبىر عارىشكەردى دايىنداۋ ءۇشىن قىرۋار قاراجات قاجەت. مامانداردىڭ ايتۋىنشا، ءبىر عارىشكەردى عارىشقا ۇشىرۋعا تولىقتاي دايىنداۋ ءۇشىن 60 ملن دوللارداي اقشا كەرەك. ال زەرتتەۋ جۇمىستارىن جۇرگىزەتىن عارىشكەردى ءبىز 7-10 جىلدا دايىندايمىز. بولاشاقتا، 5-10 جىلدا قازاقتان شىققان ءتورتىنشى عارىشكەردى ۇشىرۋعا مۇمكىندىگىمىز بار»، - دەيدى عالياسقار سارىباەۆ.
سەنات دەپۋتاتى قازاقستاننىڭ عارىش سالاسىنداعى الەۋەتىنە دە توقتالدى.
«نەگە قازاقستاندىق عارىشكەرلەر دە ۇشپاسقا؟ زىمىران تاسىعىش – ءبىزدىڭ جەرىمىزدە. سپۋتنيكتەردى دە ءوزىمىز جاساي الامىز. كوسمودروم بىزدە. قازىر عارىش سالاسىنان رەسەي ازاماتتارى اقىرىنداپ كەتىپ جاتىر. ءبىز سول ورىندى تولتىرىپ قالۋىمىز كەرەك. ول جەردە الەمدە تەڭدەسى جوق وبەكتىلەر بار، قۇرىلىستار بار. سولاردى ساقتاپ قالۋىمىز كەرەك. ەڭ باستى ماسەلە – وسى. وندا ءبىزدىڭ 40 مىڭداي ازاماتىمىز جۇمىس ىستەيدى. عارىش سالاسىندا 10 مىڭنان استام ازاماتىمىز جۇمىس ىستەيدى. سولاردىڭ ءبارىنىڭ الەۋەتىن دۇرىس پايدالانىپ، بولاشاقتا وسى قازاق ەلى، قازاق جەرى ءۇشىن پايدا بەرەتىن دۇنيەلەردى دۇرىستاپ جولعا قويۋىمىز كەرەك”، - دەيدى ول.
سونىمەن قاتار سەناتور عارىش سالاسىن دامىتۋدىڭ ەلگە بەرەر پايداسىن دا تىلگە تيەك ەتتى.
«بولاشاقتا ءبىز وسى عارىش سالاسىنا قارجى سالاتىن بولساق، ول بىزگە 2-3, ءتىپتى 5 ەسە ەكونوميكالىق پايدا اكەلەدى. سەبەبى، بۇكىل ورتا ازيا، افريكا سەكىلدى باسقا دا ەلدەر ءبىزدىڭ وسى زىمىران تاسىعىشتار ارقىلى كەڭىستىككە وزدەرىنىڭ اپپاراتتارىن شىعارعىسى كەلەدى. وزدەرىنىڭ نۇكتەلەرىن العىسى كەلەدى. ءبىز وسى مۇمكىندىكتى دۇرىس پايدالانۋىمىز كەرەك”، - دەيدى دەپۋتات.
عالياسقار تولەندىۇلى عارىشقا ۇشۋ ءۇشىن دايىندالىپ جاتقان قازاق قىزدارى دا بار ەكەنىن ايتادى.
«بيىل بايقوڭىر عارىش ايلاعىنىڭ ىسكە قوسىلعانىنا 70 جىل تولادى. 70 جىلدىق تاريحقا قارايتىن بولساق، وزگە مەملەكەتتەن ۇشقان ازاماتتاردىڭ قازاقستانعا دەگەن كوزقاراسى وزگەردى. ءبىزدى تەڭ دارەجەلى مەملەكەت، كوسموستىق دەرجاۆا رەتىندە قاراي باستادى. وسىعان بايلانىستى ءبىزدىڭ دە ازاماتتارىمىز ۇشۋ كەرەك دەپ ويلايمىن. سول ۇشاتىن ازاماتىمىز قىز بالا بولسا، ءتىپتى جاقسى. سەبەبى، تەرەشكوۆا سياقتى قازاقتا دا باتىر قىزدار بار عوي. دايىندالىپ جاتقاندارى دا بار. سولاردى ۇشىرۋىمىز كەرەك”، - دەيدى سەناتور.
