اكتەر لەوناردو دي كاپريو قازاقستان ۇكىمەتىن كيىكتەردىڭ كوبەيۋىمەن قۇتتىقتادى - ول بۇدان بىلاي كيىكتەر قازىر جويىلىپ كەتۋ قاۋپى بار جانۋارلار ساناتىنا جاتپايتىنىن ايتتى. بۇل تۋرالى اكتەر الەۋمەتتىك جەلىدەگى پاراقشاسىندا جازدى، دەپ حابارلايدى “ادىرنا” ۇلتتىق پورتالى.
لەوناردو دي كاپريو كيىكتەر حالىقارالىق تابيعاتتى قورعاۋ وداعىنىڭ (IUCN) قىزىل تىزىمىندەگى "جويىلىپ كەتۋ قاۋپى تونگەن جانۋارلار" ساناتىنان "قاتەرلى جاعدايعا جاقىن" ساناتىنا اۋىسقانىن ەسكە سالدى.
«بۇل بۇرىن-سوڭدى بولماعان جاعداي قازاقستانداعى اقبوكەن پوپۋلياتسياسىنىڭ كەرەمەت ساقتالۋىن كورسەتەدى. 2005 جىلى بۇل ءتۇردىڭ سانى نەبارى 48 000 بولدى، ال قازىر ول جابايى تابيعاتتا 1,9 ميلليوننان اساتىن كورسەتكىشكە جەتتى. براكونەرلىككە قارسى كۇرەس باستامالارىنا، قۇقىقتىق ءتارتىپتى نىعايتۋعا جانە جاڭا قورعالاتىن اۋماقتاردى قۇرۋعا قوماقتى قاراجات سالعان قازاقستان ۇكىمەتىن قۇتتىقتايمىز. ولاردىڭ تابيعاتتى قورعاۋ ۇيىمدارىمەن، ۋنيۆەرسيتەتتەرمەن جانە عالىمدارمەن ىنتىماقتاستىعى – بىرلەسكەن كۇش-جىگەردىڭ ارقاسىندا قول جەتكىزىلگەن تابيعاتتى قورعاۋ ىسىندەگى شىنايى تابىستىڭ جارقىن مىسالى»، - دەلىنگەن دي كاپريونىڭ Instagram-داعى پاراقشاسىندا.
بۇعان دەيىن ەكولوگيا مينيسترلىگى حالىقارالىق قورعاۋ وداعى كيىكتەر قازىر جويىلىپ كەتۋ قاۋپى تونگەن جانۋارلار ساناتىنا جاتپايتىنىن حابارلاعان بولاتىن.
ايتا كەتسەك، World Wide Fund for Nature رەسمي سايتىندا اكتەر لەوناردو دي كاپريو قورشاعان ورتانى قورعاۋشى جانە مەتسەنات رەتىندە جازىلعان. 1998 جىلى ول ءبىزدىڭ پلانەتامىزدىڭ تۇراقتى بولاشاعىن قامتاماسىز ەتۋگە باعىتتالعان ۇيىمدار مەن باستامالاردى قولداۋ ءۇشىن ءوز قورىن قۇرعان.
WWF-تەن بولەك لەوناردو وسى ماسەلەلەرمەن اينالىساتىن بىرنەشە ۇيىمنىڭ كەڭەسىندە، سونىڭ ىشىندە تابيعي رەسۋرستاردى قورعاۋ كەڭەسى (NRDC), Global Green USA جانە حالىقارالىق جانۋارلاردى قورعاۋ قورى (IFAW) باسقارما قۇرامىندا بار. كەيىنگى 12 جىل ىشىندە لەوناردو نەگىزگى ماسەلەلەرگە جۇرتشىلىقتىڭ نازارىن اۋدارۋ بويىنشا ستراتەگيالىق جۇمىس جۇرگىزىپ كەلەدى.
